Drs. Jerry Staring a presenta awe bek na DVG

Awe mainta drs. Jerry Staring, Director di Departamento di Salud Publico (DVG) a presenta mainta trempan na su trabou, pa asumi su funcion bek. Esaki tin di haber cu e “ter beschikkingstelling” a vence den december ultimo caba. E tabatin algun dia AO y despues a pega algun dia di vakantie su tras cu a caba diabierna. Pues awe el a yega pa traha atrobe, pero a haya di tende cu Minister lo mande otro carta atrobe, cu e por bay cas bek.

Manera ta conoci, Minister Dangui Oduber a pone na su disposicion pa nan por conduci un investigacion riba e funcionamento den DVG. E compania Advance di Jan Noordzij a conduci e investigacion, cu entretanto a keda cla y a entreg’e caba. Pues ta momento pa e mandatario tuma un decision; sea ta reinstitui Staring bek den funcion, of ta kit’e for di trabou si acaso e investigacion ta bisa tal. Abogado di Staring a sigura cu e rapport no ta bisa nada di funcionamento di Jerry Staring, sino mas bien di procesonan di Recursonan Humano cu ta den man di e departamento DRH di Gobierno. Ta bisa entre otro cu no ta duna e trahadonan suficiente curso, pero esey ta mara na e mesun presupuesto di gobierno cu ta bou presion enorme e ultimo añanan cual ta conduci cu mester corta den presupuesto tur aña.

Minister Oduber a pone Staring na disposicion mara na un temporada specifico y dicho temporada a vence. Gobierno a haci uzo di su derecho di alarga e proceso un biaha mas y entretanto esey tambe a vence na december ultimo. Pues awor ta ora di berdad, mester dicidi kico ta haci cu e funcion di Director di DVG, pasobra Minister Oduber mester tin motibo valido pa bolbe alarga e periodo. Entodo caso e investigacion no por ta e motibo mas, pasobra esey ta cla.

Awe a sali afor cu e Decreto Ministerial (MB) pa alarga e temporada di trabou di e “management team” a pasa den Conseho di Minister y cu a alarga esey cu tres luna mas, pues te cu maart 2019. Pero mientras cu a regla esey, no a regla e fecha di vencemento di e periodo di disposicion di Jerry Staring. Por spera cu lo tuma luga un otro caso sumario den Corte den e dianan aki ainda, pa obliga Gobierno pa re aloca Staring bek den su funcion. Abogado mr. David Kock ta encarga cu defensa di Jerry Staring mientras cu bufete di abogadonan Gomez Coffie ta trahando pa Gobierno den e caso specifico aki.

Comments

comments