Diahuebs atardi cuminsa fo’i 5:00 di atardi e team di Crimen Organisa a cuminsa cu varios entrada hudicial. Durante esaki, a bishita por lo menos cuater bario; Paradera, Paradijswijk, Monserat y Cas Ariba.
Esaki ta un golpi pa e baho mundo di droga mirando cu a confisca basta mata di marihuana. Na Monserat tres sac’i sushi preto yena cu droga.
Na por lo menos dos cas a bay cu basta mata di droga y alabes a confisca algun artefacto. Tambe tabatin diferente detencion. Durante e entrada hudicial tabata t’ey presente K-9 Unit, polis, Recherche y tambe Elmar. E noticia aki ta keda den desaroyo, por spera mas entrada hudicial.
Monserat
Na Monserat a detene persona y a confisca cantidad grandi di mat’i Marihuana. A bay cu por lo menos tres saco yen di mata nan di Marihuana. Aki a haci uzo di e unidadnan di K-9 y demas unidad nan pa duna refuerso.
Paradijswijk
Ta den Caya Frere Henricus, ora cu team di aresto compaña pa e recherchenan di Crimen Organisa a drenta un compleho di apartamento y confisca basta articulo. Aki tabatin refuerso di team di Mobiele Eenheid. Compara cu e otro casnan, aki a confisca menos articulo di baho mundo, entre otro; droga.
Paradera
Na Paradera, tabata unda a confisca mas hopi droga y materialnan special pa plantacion. Por lo menos dos pickup di polis tabata presente pa bay cu cantidad grandi di mat’i Marihuana y articulo special pa plantacion. Di e dos pickupnan; un a bay yen yen cu mat’i Marihuana y e otro cu ekiponan special manera van, gas, luz y foam special pa plantacion.
E matanan tabata scondi den un camber cera. Aki a detene por lo menos dos persona cu ta biba n’e cas. A confisca tambe un Toyota Mark X. Ta for di algun dia caba tabatin bista rib’e cas ‘ki. Personal di Elmar tabata presente mirando cu tabatin konkelmento cu coriente for di e palo di luz.