Kustwacht y Polis den accion: A confisca droga y a gara 13 ilegal den Colony

8527
Foto cortesia: Jesse Rasmijn

E accion di Polis y Kustwacht pa e lucha contra droga a continua marduga. A logra haya droga y tambe haci diestres detencion den oranan di marduga. E vigilancia a sigui te den oranan di mainta. Mientras cu Kustwacht tabata riba lama y tera, Polis tambe cu nan Kust Surveillance tabata cu basta personal den e area di Colony entre otro.

E sospecho tabata cu e boto lo drenta entre Savaneta y Sero Colorado. A keda pendiente pero e boto a logra drenta sin cu nan a mire. E lama bruto y situacion di tempo ta haci e trabou un tiki dificil pa autoridad. Esey kiermen cu e boto a logra bay pero na tera autoridad a logra pone man riba cuater sospechoso cu a yega tera y e bultonan di droga.

E movecion aki ta confirma cu e capitan di e boto aki sa precies con e mester maniobra pa drenta sin cu a logra capte of mire riba e radar. E ta un riesgo pa esnan riba lama den boto cu e lama malo. Di pazuid nan no ta worry risca nan bida. E radar di Kustwacht y esun di Polis no a detecta e boto. Kizas pa e tempo cu lama hopi malo y biento fuerte. A cera e area di Colony pa asina atende cu esnan cu a subi tera y a pone man riba nan. Polis a activa tambe e helicopter. Esnan cu mainta gusta bay haci ehercisio den Sero Colorado no por a drenta Colony.

A base di interogacion mester bay saca afo cuanto hende por a yega y ki ora exactamente nan a yega. E esfuersonan di autoridad ta continua den bon tempo y mal tempo pa asina para tur ilegal y droga cu kier yega Aruba cune.