Drive Thru Fruit Store Aruba a regala Emmaschool saconan di fruta

422

Drive Thru Fruit Store Aruba ta un fundacion familiar, di cual nan a dicidi di lanta den e momento di crisis aki cu comunidad ta bibando. Nan ta young entrepreneurs, prome negoshi hunto y familiar. Nan tin 3 luna riba mercado pero a dicidi di haci un bunita gesto na Emmaschool.

Nan ta eynan pa duna diferente saco di fruta p’e muchanan, asina Juan Manuel Kelly ta e fundado di Drive Thru Fruit Store Aruba, a bisa. Esaki ta pa cultiva e bienestar di nan pa loke ta trata salud. Drive Thru Fruit Store Aruba ta kere cu e salud ta primordial aworaki den e momento cu no tin vacuna p’e Covid-19.

Un bon alimentacion ta crucial pa nan y e muchanan. Drive Thru Fruit Store Aruba a tuma contacto cu e cabesante di scol y a informa cu nan ta 175 persona. Esey a pone cu nan a scoge pa bin cu un tiki mas extra, unda cu ayega na e scol cu 200 pa 235 saco cu fruta.

Na Emmaschool e muchanan a haya un treat special for di Drive Thru Fruit Store Aruba y ta hopi agradeci for di e compania. P’esey ta gradici nan di a trece e frutanan, asina Martica Lugay-Franken, Guia Interino Zorg team a bisa. Na scol ta trata e topico di come saludabel, biba saludabel. Cada mucha a ricibi un saco chikito di fruta pa nan disfruta di dje.

Esnan cu ta interesa pa acerca Drive Thru Fruit Store Aruba por pasa na Ayo 9-G, cu ta keda 5 minuut di Emmaschool. Tambe por tuma contacto cu nan na 5677558, via Instagram page of Facebook page cu ta DTFSA. Ey riba nan sa bin cu specialnan riba diferente combo di fruta y tambe por pasa busca batido di fruta cerca nan.