Driftmento na Paradera a caba den accidente pisa

Awe madruga pa mas o menos 3:45am, net momento cu un patruya ta hiba un chauffeur sin rijbewijs su cas na caminda pa Santa Lucia, poco pariba di e rotonde Paradera, a topa cu un accidente cu a sosode casi nan dilanti. Un auto marca Nissan modelo Skyline cu tabata drift a perde control dal riba un palo di luz y di cual e chauffeur a resulta seriamente herida.

E Polisnan a activa mesora y a constata cu e chauffeur tabata herida pero a keda pega den e auto, pa cual mester a pidi sosten di Bomberonan pa yega cu nan Truck di Rescate pa corta e auto pa saca e chauffeur.

Na yegada di e ekipo di rescate di Bombero a corta e vehiculo y a span e dashboard den cual e pia di e chauffeur tabata pega. Despues di e cortamento y e resto di trabao di rescate a logra saca e victima y transport’e cu urgencia pa hospital.

NV Elmar a bin despues pa verifica e palo di luz envolvi den e desgracia. E auto mes, un auto RHD, a sufri hopi daño material. E caminda a keda basta rato cera pa por a libera e victima y conduci un investigacion na e sitio.