Dr. Yves “Payo” Schoop ta kompromete su mes pa sigui lucha kontra femisidio i violensia relashonal

Djadumingu ultimo Dr Yves “Payo” Schoop, mediko i aktual Parlamentario pa Partido MAN a partisipa na e kaminata solèm “ TA BASTA”, organisá pa hòmbernan balente di grupo 20.

Dr. Schoop komo mediko ta wordu konfronta ku diferente kaso di violensia relashonal kontra di hende muhé. Ademas semper e tabata preokupa ku e situashon di tantisimo kaso di violensha domestiko entre pareha nan aki na Korsou. Banda di esey tambe su preokupashon tabata pa ku abusu di hobennan. Pa motibu di su preokupashon, den pasado semper el a aporta boluntariamente na organisashonnan no gunbernamental i tambe gubernamental ku ta traha ku e temanan di abusu.

Dr Schoop tabata presidente di Stichting Slachtofferhulp Curaçao den aña nan 2007 te ku 2010. Eynan el a yuda pone e fundashon riba pia prome ku e traspaso pa Pais Korsou na 10-10-10 ku un hunta di supervishon ku hendenan profeshonal, kapas i dedika pa yuda viktimanan di delito i aksidente di trafiko. Ya eynan tabata visto ku hopi kasonan di delito tabata relashona ku violensha domestiko. Tambe dr. Schoop tabata sostene i konseha den diferente proyekto di konsientisashon i di ‘teach the teachers’ di Bos di Hubentut pa maestronan por señala den un fase trempan ora alumnonan ta viktima di abusu relashonal. Dr Schoop tabata tambe enbolbi komo mediko di konfiansa ( vertrouwensarts) i di konsulta pa Stichting Kinderbescherming Curacao (SKC) ora tatin sospecho i/o un denunsia anonimo di abusu di mucha via e liña pa mucha di SKC.

Na final di e marcha di djadumingu ultimo na Brionplein, dr. Schoop a keda inmensamente i emoshonalmente konmove pa e historia di violensha brutal di hinkamentu i bashamentu di binager i intento di femisidio ku un viktima relativamente hoben a trese dilanti di su propio persona ku a tuma luga na 2017 dor di su ex-kasa. E viktima a keda sikatrisa pa restu di su bida, fysikamente, mentalmente i psykologikamente. Tambe e realisashon ku e sifra di femisidio (19 for di aña 2001 t/k oktober 2019) ta espantosamente haltu den nos pais ta rason pa e lucha kontra violensha kontra di e ser hende muhe mester stop awor!

Diferente punto di defisiensia den e kadena hudisial a bini dilanti den e diskursonan ku famianan di viktimanan di femisidio a trese dilanti, manera falta di sufisiente protekshon pa e viktimanan dor di kuerpo polisial, falta di persekushon i enkarselashon inmediato di e abusador, falta di guia na esnan ku a hasi nan mes kulpabel na violensha domestiko i falta di sosten na e viktimanan mes tambe. E Plan Nashonal pa kombati violensha relashonal i kontra hoben ku ta un koperashon di kuater Ministerio ( SOAW/Jus/GMN/OWCS) lo sinta pronto ku e grupo 20 i otro NGO’s pa yega na implementashon rapido pa sigui konsientisa i kana e kaminda korekto pa evita un siguiente viktima di femisidio na Korsou. Esaki mester sosode mas rapido ku lihe. Finalmente dr. Schoop ke pone e enfasis riba prevenshon pa medio di konsientisashon i edukashon pa tur hogar i na tur skol. Dr Schoop ta di opinion ku edukashon di ròlnan di genero ( hòmber i muhé) ta kuminsa na kas mes i ku mayornan mester ta ejemplar den esaki  pa despues maestronan por sigui istrui riba e edukashon duná na kas. Ku otro palabra ‘Hogar mester bira e prome Skol i Skol mester bira e di dos Hogar” asina dr Schoop ta finalisa bisando.