E estudio haci bou nomber di SARS-COV-2 mRNA pa bin cu vacuna contra Covid-19 na Selcuk University Faculty of Medicine ta inclui den e “monitoring list” di World Health Organization (WHO). Ta trata aki di e prome universidad di Turkia pa conduci un proyecto asina pa desaroya un vacuna contra Covid-19, un di e poco universidadnan purbando na mundo! Ex Minister dr. Richard Visser y su pareha Aysel tabata invitado di e ekipo di profesornan trahando riba e vacuna.
Ta bon pa menciona cu e universidad aki, tin no menos di 100 mil studiante, pues mesun hopi habitante cu henter nos pais. Dr. Visser, conoci pa su envolvimento den VERA Health & Education Projects ta conduciendo otro proyectonan na Turkia tambe. Ey nan a cera conoci cu Prof. Dr. Nadir Koçak, cu ta na cabes di e ekipo special di expertonan cu lo por bin cu un vacuna pa salba mundo.
Mester menciona cu tin mas di 2 mil di e proyectonan aki tumando luga tur rond di mundo, esta expertonan cu ta purba desaroya un vacuna contra e virus. Pero, e organisacion mundial di salud a inclui solamente 165 di nan riba su “watch list”, den cual e universidad di Turkia orguyosamente tambe ta aparece.
Richard Visser a bisa di ta kere cu pa october caba nan lo conduci testnan y cu despues di esey lo por spera noticia si acaso e testnan sali positivo. Ki impacto esaki por tin pa Aruba e no por bisa, pasobra Turkia a pone enfasis cu nan prioridad ta nan mesun pais prome.
