Dr. Rajnherc: ImSan ta bayendo riba un bon direccion

Por lo menos un 9 aña pasa, henter e proyecto di ImSan a wordo poni keto y e gobernantenan di e tempo ey a bay busca kico por wordo haci cu ImSan.
Segun director Joel Rajnherc, a scoge pa haci ImSan un centro di tratamento di malesanan cu no ta comunicabel, cu ta cronico. A base di nos manera di biba cu su diabetes, cu sobrepeso, cu presion halto di sanger, cu problemanan di riñon, cu problemanan di wowo. Den e verlengde di esey tambe, obviamente e posibilidad pa haya cancer.
Tur eseynan ta en realidad e malesanan cu ImSan ta fiha su mes riba dje pa bay duna e tratamento. Ya for di hopi tempo ta suministra henter isla e servicio di ambulance. Por ta hopi orguyoso di unda nan tabata para, mas of menos un 8 pa 9 aña pasa, y unda nan ta awo.
E situacion a mehora tremendo, personal ta debidamente diploma y certifica. E ekipo cu ta uzando ta ekiponan moderno y sofistica. Otro departamento cu tabata existi pa hopi tempo caba ta e departamento pa trata diabeticonan. E ta bayendo hopi stabil y hopi bon y ta hopi contento cu e funcion cu tin pa loke ta e pashentnan riba nos isla.
Un otro departamento cu a habri den 2013, tabata e departamento di dialysis. Ora cu a cuminsa, a cuminsa cu wak den futuro. A traha luga pa 18 stoel, keriendo cu esey lo bay duna hopi tempo pa yega eynan, pero ya a wordo alcansa pa e berdad y cu en realidad falta stoel pa tratamento.
Dr. Rajnherc a splica cu e otro desaroyonan cu kier a haci na ImSan tabata modernisa e tratamento cu ta dunando di wowo y entre tanto ya a yega na tres specialista di wowo cu ta traha na ImSan y a bay amplia y mehora e servicio. Ta trahando e oficinanan di e specialistanan cu tur e luganan pa haci diagnostico completamente nobo na ImSan. Ta spera cu esey ta bay ta cla aproximadamente den luna di Mei.
Ta gradici tur pashent cu ta cargando tur e inconveniencianan di bouw, di stof, cu desordo, martiu cu ta bati y ta aprecia hopi cu nan no ta keha henter dia y tur dia. No solamente pashent, pero tambe e empleadonan.
Ora esey ta cla ta bay tin e ekiponan mas moderno den e edificio, pa duna casi tur e tratamentonan posibel y diagnosticonan den e espacio nobo.
E siguiente fase cu ta trahando riba dje caba ta e departamento di sterilisacion di instrumentonan. Esey ta spera cu lo keda cla pa final di April, cu lo ta operacional cu tur test wordo haci y tur ekiponan. ImSan ta hopi satisfecho con e construccion ta bayendo.
Bao di esey, ta haya e departamento di operacion. Tin e salanan di pre y post operacion y e salanan di operacion mes. Ta bin dos sala di operacion general pa specialistanan ciruhano, pero tambe ortopedico, pa neurocirugia, tambe si specialistanan estetico por bin haci operacion eynan. Tambe tin un sala di operacion specialisa y dedica pa operacionnan pa wowo. Kiermen cu ta kere cu por amplia e servicio drasticamente door di habri e departamento eynan. Fuera di esey ta bay haci algo cu nunca a wordo haci ainda na Aruba, cual ta pa duna tratamento di radioterapia. E bestraling pa e pashentnan cu cancer.
Aproximadamente 250 pashent anualmente ta bayendo den exterior pa haya e tratamento aki. Tur e pashentnan ey ta spera mas of menos 90% por ta trata na Aruba y e 10% so ta asina complica of asina avansa cu nan mester di aparatonan cu na Aruba no por cumpra cu economicamente ta bal la pena pa Aruba. E pashentnan ey mester mandanan afo. Ta spera cu si tur cos bay bon, por haya ayudo di Baptist Health of South Florida, pa mira unda ta e miho luga pa nan haya tratamento y cua tratamento ta e miho pa nan.
Entre tanto, ta kere cu e bunker ta bayendo hopi bon. Tur e material cu tabata tin mester di dje pa traha e murayanan y e dak di blokinan masha special cu a bin for di Merca traha caba y a wordo poni den otro akinan, ta na su luga. Awo ta bira e parti di decoracion, pone coriente y e airconan den e bunker y laga e mashin di bestraling bin. Ta spera cu pa fin di September ta cla cu e departamento aki tambe. Pero esey ta e bunker.
Banda di e bunker ta bay tin henter e departamento di radioterapia, unda e specialista di radioterapia ta sinta, pa wak su pashentnan, tin trahado social. Ta percura pa tin e zusternan cu tin mester. Full e onderzoek por ta cla eynan. Pa por haci radioterapia, bo mester por haci e simulacion cu un CT Scan. Esey tambe ta bay bin den e departamento di radiologia. Esey tambe ta hopi avansa caba. Ta bay modernisa tur e ekiponan y e ekiponan existente ta wordo reemplasa pa ekiponan nobo. Henter e departamento ey ta wordo reconstrui completamente. Na final, ta keda cu un SEH, un policlinica, manera hopi biaha ta yam’e na Aruba, cu ta bay wordo renoba completamente.
Dr. Rajnherc ta hopi gradicido na e empleadonan, pasobra no ta facil pa sigui duna e mesun calidad di servicio cu ta custumbra di duna, ora cu ta bao di construccion. E ta hopi dificil. Cada biaha personanan di servicio di limpiesa tin cu bin bek pa haci limpi. No ta mira ningun personal cu ta keha riba esaki. Tur hende ta purba di coopera, tur hende tin bon comprension. ImSan ta bayendo den un bon direccion. Tin reto, tin cosnan cu di antemano no por pronostica cu lo tey, pero a haya solucionnan pa tur e retonan aki y un pa un ta wordo resolvi. Te awor aki tin algun departamento cu a bay tiki mas lihe cu a spera, otro departamentonan menos lihe. Pero averahe ta bon riba schedule y ta spera cu por cumpli cu pa fin di Maart 2020, lo ta full cla.

Dr. Rajnherc: ImSan ta bayendo riba un bon direccion

Dr. Rajnherc: ImSan ta bayendo riba un bon direccion

Posted by 24ora on Thursday, March 21, 2019