Skirbi pa Clyde Harms
E corant cultural “El Maracaibeño” a yama Dr. Mac Gregor “uno de los hombres más destacados de la medicina en el Zulia” y ta menciona cu “como historiador también destacó notablemente.”
Berdaderamente e curiculo di Dr. MacGregor ta impresionante, y el a wordo reconoci ampliamente: Pa tres universidad y e “Red de Sociedades Científicas Médicas Venezolanas (Excelencia en Reumatología).” Servicio de Inmunorreumatología di Hospital Universitario di Maracaibo ta carga su nomber, mescos cu un aula di Facultad di Medicina di Universidad del Zulia. Dr. Macgregor a wordo condecora pa cuater diferente instancia: Orden “Dr. Jesús Enrique Lossada,” Orden “Lago de Maracaibo,” Orden “Ciudad de Maracaibo” y Orden “Al Mérito Ciudadano.”
Como autor, Dr. MacGregor a skirbi shete textos cu ta trata di Medicina, seis di nan tabata cubri historia, uno cu temanan sociologico.
Dr. MacGregor tabata un fundador y “miembro de numero” (#12) di e Academia de Historia del Zulia. (Presidente 2003-2005).
Mi a conoce Dr. MacGregor via su columna di tur diamars den e corant “La Verdad.” Mi a mande mi comentarionan algun biaha y cu tempo nos a forma un amistad virtual basa riba nos amor comun pa historia. Despues e tabata manda mi tur loke e a skirbi. A resulta cu e tabata e reumatologo cu tabata trata mi suegra y mi a conoce personalmente un biaha cu mi a compaña mi suegra na su clinica. Aña pasa cu e tabata na Aruba pa disfruta di su time-share na Renaissance Hotel, nos a pasa basta tempo hunto y el a mustra un gana di lesa mi bukinan, especialment ora cu mi a mustre e parti den “Historia di Baseball di Aruba” cu ta conta con un Aparicio a hunga un rol importante den desaroyo di baseball na Aruba.
Apesar cu nunca el a siña Papiamento, apenas tres dia despues cu el a yega bek na Maracaibo, el a skirbi mi pa haci algun pregunta tocante “Hisoria di Baseball di Aruba.” “Con por ta posibel”, el a puntra, “cu Jim Bluejacket no a wordo menciona den e buki. Bluejacket tabata un pelotero den liga mayor na Merca prome cu el a bin traha na Lago.” Cu e pregunta aki, Dr. MacGregor a mustra cu e tabata conoce historia di baseball y historia di Aruba. Ami y mi señora a keda hopi impresiona. (Bluejacket no a wordo menciona pasobra el an hunga solamente den Colony, y pa ami como autor, y mi colaboradornan, Colony tabata mescos cu un otro pais pafo di Aruba). E tabatin hopi pregunta tambe tocante e historia di e atake di submarino pasobra e tabata skirbi un buki “La Influencia de los Estados Unidos en Maracaibo” (obtenibel via Amazon) den cual e ta recorda con e refinerianan di Shell na Corsou y di Lago na Aruba a haya bida.
Te algun siman pasa ainda Dr. MacGregor a skirbi mi y bisa mi cuanto e y su esposa Isabel tabata anhela di bin Aruba atrobe na september. E tabata stima Aruba! Cu su fayecimento, Venezuela, y Maracaibo en particular, a perde un gran ciudadano, un gigante cultural . Y ami y Aruba a perde un amigo. Cu Ernesto García MacGregor haya descanso eterno.
