Ex-Minister di Husticia pa e ultimo 8 añanan y actual Parlamentario di Fraccion di AVP den Parlamento a reacciona fuerte awe den e conferencia di prensa di AVP. E tabatin critica pisa contra e maneho sin vision di e actual Minister di Husticia, mr. Andin Bikker. E ex Minister a sigura di a laga fondo atras pa adkiri 3 radar mas, pa asina cera e “blind spots” nan.
Tambe Parlamentario Dowers a enfatisa cu a yega na cooperacion entre Kustwacht y Polis pa traha hunto. Mester ta cla pa tur hende cu Aruba so no por combati trafico di ilegalnan, sino e mester ta un esfuerse di henter Reino Caribense Hulandes pa traha 24/7 pa cubri nos frontera.
Mas ainda ex Minister Dowers a splica awe cu a laga autonan specialisa atras pa haci e trabou aki, den cual Polis, Douane y Kustwacht lo patruya nos costanan den forma di un asina yama “Kustsurveillance”. E unico cos cu Minister Bikker mester a caba di regla ta pa e autonan no paga invoerrechten, locual a dure mas di 6 luna pa pone su firma y haya aprobacion di Minister di Finansa.
“Awe nos ta bibando e momentonan mas complica den e ultimo 50 añanan den proteccion di nos frontera”
Andin Bikker cu tabata Parlamentario y awe ta Minister tabata pretende cu tur cos ta facil, cu e tin solucion pa tur problema mientras awor henter comunidad ta confronta cu e realidad.
“Uza bo cabes, bo TINO y uza servicionan di inteligencia di Aruba pa combati criminalidad y coopera cu tur servicio di inteligencia di region pa gana e bataya aki”, asina Parlamentario Arthur Dowers a conseha Minister Andin Bikker.
