Ya caba a drenta luna di october y DOW ta preparando adelanta pa e ultimo siman di december, cual ta e temporada druk di klapchi.
Rubin Ponson, experto den explosivo di DOW, a comenta cu durante henter aña nan ta bezig cu diferente peticion pa shownan di vuurwerk, importacion di vuurwerk. Pero e parti di fin di aña semper ta bira esun mas ocupa cu permiso pa bendemento di klapchi, manera tur hende sa.
Durante henter aña ta preparando ya pa esakinan, pa esnan cu ta busca e permiso pa importa e vuurwerk y esey mientras tanto mayoria di nan a haci esaki caba. A trata e peticionnan, sperando pa e temporada yega.
Kico ta haci durante aña
Semper na cuminsamento ta evalua e temporada anterior y mira kico por drecha riba esakinan y pa cuminsa prepara pa e peticionnan cu ta cuminsa drenta pa e fin di aña atrobe. Ponson a comenta cu si mira e cantidad cu a sobra di aña pasa, ta un cantidad basta grandi. Ta spera cu e aña aki lo por sali for di esaki, apesar cu tin cu bisa cu e peticionnan cu a ricibi caba pa importacion, ta bastante atrobe.
Con na tempo nan ta
Si pidi e cargamento awo, semper e por yega, aunke cu mayoria di pedido a wordo haci caba. Pero semper ta warda e ultimo luna pa por confirma en berdad si tur e containernan aki ta poni riba barco y si berdad ta bay entrega na Aruba. Aki por confirma e cantidad cu ta bay drenta riba nos isla. Pero loke ta e peticion pa e importacion aworaki, sa cu tin bastante.
DOW tin deseonan pa evita cu tin asina tanto klapchi. Nan a purba varios biaha pa resta menos klapchi posibel. Ultimo nan tabata bezig purba otro maneranan pa haci esaki, pero keto bay e ta keda bira un situacion poco fastioso. “Nos conoce free enterprise na Aruba. Bo no por stop un hende di importa e productonan aki.” Segun Ponson, esey ta e caminda cu tin cu purba di yega hunto cu nan pa cumbini cuanto lo por trece, apesar cu tin cu bisa cu mayoria di nan ta na altura di e cantidad cu a sobra aña pasa, toch ta mira cu tin un cantidad grandi di peticion haci pa trece vuurwerk atrobe.
Tin cu bay wak si ta peticion so of e ta keda te na peticion of si en berdad e vuurwerknan aki ta bay yega Aruba, Ponson a splica.
Maneho di klapchi
DOW tin e maneho di klapchi, Ponson a splica, esta e vuurwerkbeleid, cu ta skirbi den dje tur loke bo mag trece, con bo por uz’e, unda bo por uz’e. Tur esaki ta para den e maneho. Normalmente ora nan entrega e peticion, nan ta entreg’e hunto cu e lista cu nan ta bay importa. Ta pasa door di e lista aki pa mira si tin algo cu por reconoce cu kisas por ta ilegal. Pero en todo caso, ora e peticion ta haci y nan haya nan permiso, semper nan tin cu cumpli cu e reglanan cu tin. Na e momento cu e containernan yega, esaki lo ta controla ainda pa Aduana pa mira si tin algo iregular den dje cu mester tuma medida.
Iregularidadnan
Semper por haya situacionnan kisas cu un hende por a lubida algo y algo a pasa. Pero p’esey tin diferente departamento cu diferente hende, diferente ambtenaar ta traha den e temporada aki pa controla, pa mira cu tur cos ta bay bon.
DOW ta sali for di e punto cu tur klapchi a drenta. Despues di esaki ainda ta tira control riba diferente luga pa sigura y confirma cu no a haya nada. Ponson ta spera cu esey ta e caso tambe, cu tur klapchi ta entrega na final di benta.
Benta di klapchi
Ya pa hopi aña caba por a tuma nota cu e benta di klapchi ta cayendo poco poco. Te cu awor aki tin un calculo di entre 16 pa 18 container cu lo ta e maximo cu lo por trece riba nos isla y cu lo por bende of bende casi tur.
Reunion cu bendedonan
Manera semper e reunionnan cu ta yama, e asistencia ta hopi poco. Ta algun di nan semper ta bin, cual ta e mesun grupito. Pero ta keda haci esaki tur aña. Awor aki ta pendiente pa un otro reunion pa cuminsa papia cu nan un biaha mas, y pa hiba nan na e temporada druk cu ta bay bin.
Estricto
Ya pa algun aña caba, e vuurwerkbeleid a sali caminda cu tin cu bisa cu mayoria di nan poco poco a cuminsa custuma. Tin cu bisa cu e ultimo añanan e ta bayendo basta bon. Nan ta coopera y bo ta haya cu e mesun hendenan ta keda bende y nan ta na altura di e reglanan. Te awor aki e ta bayendo bon.
Peticionnan
E peticionnan pa loke ta importacion a drenta caba. Awor aki ta bay ta un poco laat si tin hende cu kier haci e peticion pa e vuurwerknan por yega na tempo pa december. Loke tin cu bay haci ta e peticion pa bendemento mes, cual ta e puntonan di benta riba nos isla.
Segun e maneho di vuurwerk, nan mester por yega prome cu december habri. E ultimo dia di november, tur ora ta purba aim pa esaki, pero ta mira cu semper tin un problema sea cu barco of caminda cu e klapchi tin cu sali. Kisas e por yega un tiki laat, pero ta purba di haci’e tempran pa asina por tin e klapchinan aki riba mercado na tempo y cu e trabao por ta bon sigura, Ponson a bisa por ultimo.
