Den cuadro di e crisis di Covid-19 y e MR corespondiente di Gobierno di Aruba; prome fase di recuperacion di economia di Aruba a cuminsa y companianan di construccion y mantencion a cuminsa registra na DOW como parti di Fase 1. Hopi compania a registra ya riba e prome dianan y a entrega nan documentonan digitalmente pa asina nan por haya permiso pa cuminsa.
E proceso di verificacion a tuma luga y asina varios compania y individualnan a haya e permiso necesario pa cuminsa traha. Ta importante si pa señala cu e companianan y individualnan mester atene nan mes na e reglanan di e “Normal Nobo” den mundo di construccion y mantencion, esey ta encera cu mester cumpli cu reglanan nobo pa combati Covid-19 Corona virus na sitio di trabao. Esaki ta pa proteha e trahadonan mes, nan famia, coleganan y e comunidad di Aruba.
Pesey mes a instala un Taskforce cu lo cuminsa haci nan trabao di control entrante dialuna awor. E control ta pa sigura cu ta cumpli cu e reglanan y cu ta cumpli tambe cu e condicionnan cual a otorga e permiso cu ne. Si nota cu tin fayonan cu ta tumando lugar riba e puntonan menciona, e Taskforce tin e autoridad pa actua, duna boet y hasta para e trabaonan.
Companianan cu no a registra pero cu si ta trahando tambe por haya multa y por para e trabou. Esunnan cu no a registra ainda ta ser recomenda pa haci esaki mas pronto cu ta posibel na www.dow.aw of yama telefoon 5284858 pa haci un cita. Si bo no a registra y haya permiso, bo no por ta trahando riba ningun proyecto na e momentonan aki.
DOW y Gobierno ta spera cu tur hende compronde e circumstancianan cu nos ta pasando aden y pa nan cumpli cu locual ta pidi nan pa hunto nos restart e economia di Aruba den forma ordena, legal y sigur pa un y tur.
