DOW: Medida estricto a pone cu mayoria contratistanan ta cumpli cu nan obligacionnan

DOW tin varios contratista cu ta haci diferente trabao riba caya. Un di nan ta corta yerba banda di caminda, tene limpiesa aki aya y cuida facilidadnan cu tin manera scol. Tambe facilidadnan di atraccion na Aruba.

Tambe tin cierto teamnan ta traha den mantencion di e rooinan, canalnan di awa, yuda prepara pa temporada di awa y ekiponan cu ta traha cu DOW riba e parti di asfalt.

Segun director di DOW, Marlon Croes, a firma un contracto nobo pa cinco aña y ta specifica cu tin diferente punto di mehoracion, hunto cu mediador di gobierno, ayega un contracto cu e contratistanan.

Den e contracto aki tabata stipula cu cada tres luna, e contratistanan tin cu entrega nan documentonan di prueba cu nan a paga sociale lasten, impuesto y salario na e empleadonan.

Di parti di DOW tin cu menciona cu no a haci un control riguroso di dje, pero ta sali for di punto di bista di Good Governance di cada entidad di parti di DOW, pero di nan tambe, cu nan lo cumpli cun’e pero esey no a sosode.

Loke a ripara den e ultimo añanan, cu hopi di e contratistanan aki ta haya confiscacion di mey miyon te cu un miyon florin, cu ta manca un compania asina. Tambe a haya keho di e empleadonan mes di e contratistanan, cu nan no a wordo paga conforme ley.

Nan ta bin DOW pa busca un solucion. Den e proceso ey, naturalmente como organisacion DOW, no por mete den operacion di e contratistanan chikito, mirando cu nan ta un compania riba nan mes. Pero si ta enforsa e contracto cu nan tin cu nan firma, cu nan tin cu entrega nan documentonan mensualmente.

Na October di aña pasa a publica esaki y a duna nan te cu fin di December 2018 pa nan cumpli cu esaki. Lamentablemente no ta tur a cumpli cun’e y a extende e periodo te cu Januari 2019. A wak cu tin mas hende cu a cumpli cun’e y un biaha mas ta extende e periodo pa fin di Februari.

Na fin di Februari, 1 di Maart, tabata tin un status di 25% cu tabata falta pa cumpli cu esey y 75% a cumpli. E ora ey a bay pa mehora esaki. A introduci e maneho di No Work, no Pay, te ora cu cumpli cu tur cos, e ora ta haya trabao bek pa bo haya bo pagonan.

Esey a introduci y per 1 di Maart 25% tabata falta pa cumpli y te cu diaranson mainta, el a baha bao di 10%. Mayoria di nan ta cumpliendo cu e condicionnan cu DOW a bin cun’e.

Naturalmente, tur tin cu cumpli cu nos obligacionnan social, obligacionnan cu empleadonan y tambe esey ta parti di Good Governance di ambos partido.

Pesey DOW a duna e informacion aki, pakico a emplea un maneho basta estricto, ta pa proteha e contratistanan chikito, empleadonan y DOW mes, como organisacion.

Croes a bisa adicionalmente DOW mes y tambe contratistanan ta cambiando nan modo di opera, nan manera di haci controlnan necesario pa por garantisa cu ta hisa e productividad y eficiencia den trabao, pa asina por garantisa cu loke comunidad ta paga na e contratista chikitonan, ta bon uza.

Up to Date

A sinta cu departamento di Impuesto algun siman pasa, pa loke ta e maneho cu DOW ta hibando. A bin na un acuerdo cu si e contratistanan aki tin retraso den impuesto y tin un areglo di pago, e ora esey ta pertenece pa pasado. For di eynan por keda up to date cu loke nan ta awor aki tur luna, e ora e no tin problema. Nan tin trabao y e pago ta tuma luga.

No a kita ningun contracto. Pero si a kita contracto, ta pa otro motibo y no pa loke a menciona caba.

Control

Marlon Croes a menciona cu nan tin un ekipo cu ta controla. Den e caso aki controleurnan, cual capacidad ta limita na cantidad y ta bezig ta cambia e sistema di controla. Ta bay traha cu regio’s unda cu ta pone un controleur ta controla un area completo. No cu nan ta bula di bario pa bario, pa perde tempo. Ta aloca esaki y si tin mester di mas manpower, lo haci esaki.

Linear Park

Riba Linear Park por ehempel, tin un retraso den mantencion, cu ta di diferente disciplina. Un di nan ta vegetacion. E otro ta iluminacion mes. E di tres ta e parti di klinkernan cu a sak aki aya. Esey dos siman pasa, a sinta hunto, a planea strategia, ta haci inventario di tur e problemanan cu tin riba Linear Park. Si por ripara cu desde siman pasa, tin algun ekipo ta trahando riba Linear park, pa loke ta cortamento di vegetacion. Pa loke ta drechamento di luz, lo bay haci un investigacion unda e problema ta precies, pa e luznan por cende permanentemente, no manera cu ta awo. Ta bay tin un solucion definitivo.

E team tambe lo ta sacando klinker, drecha e fundeshi bek y pone e klinkernan bek. Den curso di e simannan cu ta bin, ta bay tin un cambio mas miho riba Linear Park.

Comments

comments