Hopi local cu ta bende nan Ponche Crema fin di aña tabata basta rabia. Nan a bay cumpra manera semper boter bashi di rum of longneck y a tende cu no mag bende boter mas. Net ora cu nan tabata den un temporada di hopi demanda e situacion aki a presenta. Dos companianan Aruba Trading y Palmera Quality Products ta bende e boternan aki. Ambos empresa a haya un carta di Duana unda ta notificanan cu nan ta violando ley cu benta di e boternan bashi.
E preocupacion di e trahadonan local di Ponche Crema a yega na oido di e Minister y hefe di Douane tambe. A busca contacto mesora cu e hefe di Cuerpo di Duana cu a splica cu ambos empresa tin nan propio producto cu nan ta emboteya den e boternan na Aruba mes. Mirando cu Duana of gobierno ta yuda pa promove productonan local, ta duna e espacio pa importa e boternan liber di impuesto. Kiermen nan no ta paga impuesto riba e boternan bashi. E ta boternan cu nan mester usa exclusivamente pa consumo propio na Aruba Trading y Palmera. Pa algun tempo nan ta bendiendo e boternan aki esnan cu ta bende Ponche Crema localmente. Esey no mag. Si nan kier bende boter bashi, nan mester paga impuesto riba e boternan. Mesora ambos compania a stop e benta.
E stop aki a perhudica e trahadonan di Ponche Crema cu a cuminsa bati na diferente porta entre otro gobierno. Den e caso aki Duana a bin cu un solucion tambe. A informa ambos empresa cu lo copera un rato mirando e demanda di fin di aña. Den e caso aki ta aparta un cierto cantidad di boter bashi y loke nan bende lo paga impuesto riba nan. Parce asina Duana a logra pa alivia e situacion. Esunnan cu ta traha Ponche Crema tambe por yega na remarca pa importa boter liber di impuesto si nan meld nan mes como trahado di producto local.
Segun e trahadornan di Ponche Crema, hasta turista ta cumpra boternan cu nan ta traha cu e producto. Pesey mes nan tabata poco preocupa pasobra ta basta pedido nan tabatin y a haya nan mes cu e situacion aki. Mientrastanto e decision di Duana a alivia e situacion pa e grupo di Ponche Crema.
