Wit Gele Kruis actualmente tin dos studiante cu ta haciendo nan pasantia na e instituto aki, uno di Universidad di Aruba y tambe e otro ta studiante di EPI.
Monique Giel-Labad, Enfermero y Tienermoeder consulent na Wit Gele Kruis (WGK), a cuminsa na bisa cu e dos studiantenan aki cu e dos studiantenan ta haciendo nan practica na Tienermoeder afdeling di WGK y como opdracht nan mester a organisa un tayer pa e mama hobennan. Pa haci esaki nan mester a cana den e praktijk, cera conoci cu e mamanan hoben, evalua e situacion, lesa nan file. Di e manear aki nan tin un bista di ki mama nan tin nan dilanti. Y basa riba esaki nan mester organisa un tayer a base di loke nan a señala durante nan practica y organisa un tayer cu nan ta mira basa riba e necesidad di un mama hoben. E mama hoben kisas tin trauma di pasado, tin problemanan psicologico, no sa con pa handle cierto problema of con pa bond cu nan yiu. Relaciona cu loke nan a señala nan a organisa un tayer di tres dia pa e mama hoben cu diferente tema cu ta relata na locual ta mira: No ta solamente e persona ta un mama hoben, pero e ta tambe un hende muhe, cu tambe ta conta. Esey ta loke e tayer a trata, “Un muhe inspira ta un mama empodera.” Y basa riba esaki a organisa un tayer di mama hoben, unda cu un grupo grandi a participa cu ta motiva y interesa pa haci esaki, pa ta un mama empodera pa nan yiu. E tayer no ta pa solamente un biaha, pero tin un sostenibilidad, cu ta bay pa largo. Cada biaha cu WGK haya studiante, nan ta bay evalua e situacion na cas y observa kico ta e necesidad y organisa un tayer pa e mama hoben. Cu a haya yiu na jong, no ta significa cu mundo a caba. Mester zorg pa nan bay dilanti, pa nan caba scol, pa ta financieramente independiente y importante ta pa nan conecta cu nan yiu. Pa nan por duna nan yiu e educacion necesario.
Marceylaine Paskel, Studiante di Universidad di Aruba como trahado social a indica cu como parti di finalisacion di su estudio, e mester a traha un proyecto pa WGK afdeling Tienermoeder, den e caso aki, den cual a organisa tres dia di tayer titula: “Un muhe inspira ta un mama empodera.” meta di esaki ta pa inspira e mama hoben pa empodera e muhe cu nan ta y como mama cu nan ta.
E proyecto aki tabata den colaboracion cu e.o. Tienda di Educacion, Fundacion Contra Violencia Relacional y otro instancianan. Enfoke di esaki ta pa papia tocante e abusonan cu nan a pasa aden, con pa trata e traumanan di bida y tambe pa siña nan con pa bond cu nan yiunan. A finalis’e cu tayer ‘Amor propio’, cu Marcelaine mes a duna. A haci esaki di manera cu e mama hoben por sali empodera y inspira pa sigui traha riba nan metanan. El a bisa cu durante tres dia nan a organisa e tayer ‘Un muhe inspira ta un mama empodera’. Y na final cada mama a haya un certificado cu ta demostra nan participacion y tambe ta un recuerdo pa nan, pa nan sigui uza cada herment cu nan a haya durante e tayer aki.
Hellen Bhagwandin ta studiante di Colegio EPI Unit Welzijn cu tambe tabata co-organisado di e tayer ‘Un muhe inspira ta un mama empodera’. Meta di e tayer aki ta pa inspira y motiva e mamanan hoben di Aruba. N’e evento aki tabatin 12 invitado y a mantene e cantidad di invitado limita pa asina e mamanan hoben haya tur e atencion cu nan merece.
