Dos Polis suspendi pa maltrato domestico

E siman aki a habri cu dos suspension den Cuerpo Policial Aruba, debi na acusacionnan serio di maltrato domestico. Ta trata di e Polisnan di inicial A.D y G.G. Ambos ta Polis pa hopi aña caba y a ocupa diferente funcion den e Cuerpo y ta trahando ultimo tempo . Nan casa of pareha a haci denuncia contra nan di maltrato fisico na cas, pa cual awor a start un investigacion interno banda di esun penal pa verifica si locual e dos hende muhenan ta acusa nan di dje ta berdad, pa dicidi riba nan futuro den e Cuerpo di Polis y pa mira si Fiscal ta dicidi di persigui nan penalmente.

Den casonan asina tin dos investigacion ta cana paralelo cu otro. E prome ta esun interno den Polis mes, maneha pa Bureau Integriteit & Veiligheid (BIV). Nan ta raporta na Altocomisario di Polis, kende na final di investigacion, hunto cu Departamento di Recursonan Humano di Gobierno (DRH), ta determina ki castigo disciplinario ta tuma contra e sospechosonan. Banda di BIV, e proceso penal tambe ta tuma luga dor di Landsrecherche, e instancia asigna pa ley pa investiga empleadonan publico, pero tambe Polis. Nan ta raporta directamente na Procurador General, cu ta encabesa henter e aparato hudicial di nos pais. Den hopi caso, BIV ta haci e “vooronderzoek” y ora nota cu tin un crimen cometi, ta envolucra Landsrecherche mesora pa persigui e Polisnan. Persecucion por nifica detencion di e sospechosonan, encarcelacion y presenta dilanti Hues.

Mester menciona cu Ministerio Publico a anuncia algun siman pasa, cu e Procurador General saliente a cambia e maneho cu den caso di violencia (maltrato) domestico, ta detene e sospechoso mesora. Hasta si e victima, mayoria bes un hende muhe, no kier entrega keho of si e haci’e y despues “trek in” e keho. Cu esey husticia kier manda un mensahe cla na comunidad, cu NO ta acepta maltrato di hende muhe den cas y cu e pensamento machista cu hombernan por maltrata nan señora den cas con nan ta haya ta bon, ta inaceptabel y castigabel pa ley.

No ta conoci si Polis a cuminsa aplica e maneho aki, pero ta nota cu den varios caso, detencion ta sigui asina cu tin bringamento di pareha. Dia cu PG a haci e anuncio aki, Polisnan mes a keda masha sorprendi pasobra oficialmente nan no a tende nada di e cambio den maneho aki.

Den e caso specifico aki, ainda ambos Polis ta liber. Mando Policial a manda un email pa henter Cuerpo Policial pa informa si cu a suspende nan di nan funcion y a prohibi nan di drenta tur Warda di Polis pa un periodo defini. Den casonan asina, ta kita nan arma reglamentario for di nan tambe.

Den por lo menos un di e casonan, ya e pareha a yega di entrega keho di maltrato contra su casa caba. A investiga e tempo ey y no a haya necesario pa detene. Tabatin un “berisping” si e tempo ey.

Altocomisario Andrew Hoo, na cabes di Cuerpo Policial Aruba no a contesta nos pregunta riba e caso aki awe. Probablemente e tin su mannan yen di tanto reto y problemanan den e Cuerpo di Polis cu e ta maneha, manera ta preso cu ta huy den dia cla, polisnan cu no ta integro y acusacionnan di metemento di politica activamente den maneho di Polis e ultimo temponan.

E hecho cu no a bay over na detencion, kisas ta nifica cu e keho duna no ta di tal indole di seriedad cu a dicidi riba detencion mesora. Cu kier investiga prome, probablemente ta nifica cu no tin prueba suficiente of pa hustifica un detencion y/of encarcelacion. Loke nos a compronde si ta cu den por lo menos un di e casonan, e pareha (of casa) di e Polis mester a pasa por lo menos un anochi den shelter pa hende muhenan maltrata.