Sindicatonan SEPPA y SIMAR a uni cu docentenan preocupa pa un manifestacion awe tardi na Bestuurskantoor. Un grupo di maestro ta sinti cu no por mas y cu Minister Lampe na un forma delibera no ta cumpli cu acuerdonan haci y ta haciendo hopi daño na e sector di enseñansa. Nan lo topa 2:30pm na Wilhelmina Park y lo marcha hunto pa Bestuurskantoor pa ey entrega nan manifiesto na Minister dr. Rudy Lampe.

E otro manifestacion ta pa 3:00pm, pero na edificio di Parlamento di Aruba. Mas o menos 600 empleado di MetaCorp y su subsidiarionan lo entrega un carta awe na Presidente di Parlamento, mr. Juan “Ady” Thijsen. Un ke otro tin di haber cu e ley cu Ministernan Otmar Oduber, Xiomara Maduro y Andin Bikker a entrega na Parlamento pa atende dia 23 di september proximo. Si e ley pasa, na un forma structura ta duna Serlimar un monopolio den recogemento di sushi. Gobierno a hisa un impuesto riba huespednan di hotel pa subsidia Serlimar mas ainda y obliga clientenan di EcoTech pa paga 210 florin extra pa aña na impuesto. Di mes esey lo mata EcoTech y kibra nan oportunidad di competi den forma husto cu Serlimar.

Banda di e retonan na EcoTech y EcoGas, Minister Maduro ta insisti pa pasa un ley nobo, den cuadro di Reforma Fiscal, pa bin cu un “Sugar Tax” riba tur refresco, hasta riba esunnan sin sucu! E impuesto riba refresco di Aruba ta esun mas halto di henter mundo.

E trahadonan den un reunion ayeratardi na Marriott Resort a mustra dicidido pa lucha pa nan trabou y pa existencia di nan compania. Otro aña MetaCorp ta celebra 100 aña di existencia, como e compania netamente Arubiano, conoci pa semper a inverti den desaroyo y crecemento di economia di nos pais.

Comments

comments