Polis a para dos persona indocumenta

Polisnan awe, durante un control buscando un auto marca Toyota modelo Vitz, RHD, a topa cu un riba e caminda di Ponton, alrededor di 2:00pm. A opta pa pidi refuerso pa por a para e auto aki cu mas Polis presente. Tabata sospecha cu den e auto aki lo tin sospechosonan cu por tin di haber cu un caso di supuesto tiramento mas trempan. A resulta cu e chauffeur y pasahero no tabata e sospechosonan busca pa husticia, pero no por a mustra un permiso valido di estadia riba nos isla.

Polis a detene ambos persona y a transporta nan pa Warda nos Costa pa por verifica si nan ta ilegal of no. Mas den atardi a laganan los bek ora por a saca afo cu nan tin documentonan na ordo. Durante controlnan den caso cu no por demostra un permiso legal di estadia, e ora lo cuminsa procesa nan deportacion mesora pa nan pais di origen.

Mester bisa cu ta diariamente Polis ta topando cu stranheronan cu ta permaneciendo ilegal riba nos isla. E practica aki ta causa daño na nos economia, debi cu hopi biaha nan ta traha pa menos, no ta conta cu ningun seguro di nan bira malo y tampoco ta paga belasting. Cu esey, nan ta haci uzo di tur nos facilidadnan pero no ta aporta, cu ta pone un presion riba caha di Gobierno.

Cifranan ta mustra cu lo mester tin entre 15 pa 20 mil stranhero ilegal riba nos isla di cual e gran mayoria ta Venezolano. E maneho di Gobierno awor ta pa saca e ilegalnan aki mas pronto posibel, den un esfuerso pa evita competencia inhusto riba mercado laboral y tur otro reto cu ilegalidad ta trece cune. Warda nos Costa pronto lo haya fondo adicional cu a bini for di Hulanda pa yuda maneha e problema di Venezolanonan cu ta biniendo Aruba buscando un miho porvenir.