Prome Minister Wever Croes awe mainta a anuncia caso nobo di coronavirus. E personanan aki a yega Aruba dos siman pasa for di Colombia y den fin di siman a cuminsa presenta sintomanan pa cual a haci e testnan necesario cu a sali positivo.
Segun e mandatario a splica, e personanan tabata den cuarentena y autoridadnan concerni a cuminsa cu “tracking” den e contactonan cu tabatin desde nan yegada na Aruba. E mandatario a bisa cu den oranan di anochi lo duna mas informacion.
E ultimo caso detecta positivo (no. 101) tabata na inicio di luna di mei y Aruba tin mas cu un luna Covid-Free (29 di mei).
Di e dos casonan nobo, un di nan mester di atencion medico.
Covid-19 a yega porta di Aruba dia 13 di maart na momento cu Prome Minister Evelyn Wever Croes a anuncia e dos prome casonan. Mester bisa cu tin registra cu tres persona a fayece di consecuencianan di coronavirus.
