Den un conferencia di prensa extraordinario di Gabinete Wever Croes, den presencia di representante di tur instancianan concerni, a haci un anuncio importante.
“Lamentablemente nos a haya e confirmacion di dos caso di coronavirus na Aruba. Nos a haci tur na nos alcance pa evita esaki, pero el a yega.” Un di e casonan cu a test positivo ta un persona cu ta haci trabou di consultancy na un empresa estatal. E tabata di vacacion na Egipto y New York y a yega Aruba cune. E di dos persona ta un Arubiano cu a bay New York y a bolbe cune.
Tur dos ta den bon estado y no tin mucho sintoma. Un tin un tiki tos. Nan ta den isolacion. E resultado aki nos a caba di haya.
Cu esaki Aruba ta bay escala su medidanan. Asina a tuma e decision cu ta bay restringi pasaheronan cu ta bini di Europa y esnan cu ta riba lista di WHO, cu excepcion di Arubianonan cu ta den exterior. Esaki ta cuminsa entrante 15 di maart y ta valido te dia 31 di maart. Entrante mayan tin 100% di control riba tur pasahero cu drenta. E di dos medida ta cancela tur actividad publico na Aruba inmediatamente. Tur actividad di Gobierno y priva ta keda cancela te cu dia 31 di maart. A dicidi como medida di precaucion cera scolnan otro siman, cuminsando for di dialuna. Muchanan por transmiti esaki facilmente pa otronan y kier frena e plamamento. E Protocol ta sigui wordo adapta diariamente.
