Awe nos a comparti cu nos usuarionan por lo menos un caso di dos Arubiano pega na Baranquilla, Colombia, sin cu por regresa nos isla. Algun dia prome di un Arubiano pega na Miami. Awe Ronella Tjin Asjoe-Croes, CEO di Aruba Tourism Authority (ATA) a confirma cu tin 210 Arubiano of residente di Aruba pega den exterior, cu a registra via e numbernan di celular di ATA.
Di e 210 ciudadanonan den exterior, por menciona cu 110 ta na Colombia, parti den diferente ciudad. E di dos grupo mas grandi di localnan pega na otro pais ta esunnan na Merca, di cual mayoria ta na Miami. Despues ta sigui Hulanda y otro paisnan na unda tambe tin Arubianonan cu pa un motibo of otro no a logra regresa na tempo, prome cu a cera frontera pa turista y pa nos localnan.
Mester menciona cu abogadonan ta puntra nan mes con Gobierno por cera porta pa su propio ciudadanonan. Nan ta imagina cu lo por bin casonan den Corte. Gobierno a laga para aerolineanan di permiti Arubianonan subi avion pa bin nan pais, forsando nan keda den otro pais net den momento di crisis!
Ronella Tjin Asjoe-Croes a splica awe cu Arubianonan cu ta aplicando pa haya ayudo di ATA pa permiti nan subi avion pa regresa Aruba mester mustra nan cedula y carchi di AZV. Esey pa confirma cu no solamente nan ta Arubiano sino tambe cu nan ta residente di Aruba. Nan por hasta aplica pa haya ayudo financiero di ATA den e momentonan aki, den cual nan ta pega den exterior pasobra Gobierno mes a cera porta pa nan!
Den e dianan aki tin vuelo for di Merca y Hulanda ainda, den cual awo lo mester informa e aerolineanan cu Gobierno di Aruba a cambia di pensamento y cu awo si ta permiti pa su mesun ciudadanonan por regresa nan pais, enbes di laga nan pega na otro paisnan. Pero hasta den e decision aki tin reto, pasobra for di Colombia no tin buelo mas pa Aruba. Gobierno lo mester paga buelonan charter for di diferente ciudad, pa trece nos Arubianonan bek cas. Ta pidi cooperacion di tur pa ta pendiente pa biaha pa e ciudadnan for di unda lo tin e buelonan aki pa Aruba.
