Recientemente City Inspector hunto cu polis a reparti multa na un criado di bestia na San Nicolas. Ta trata di Ruben Geerman, caminda cu polis y City Inspector a topa cu tres porco morto den su cunucu.
Geerman a admiti cu e porconan tabata morto for di januari ultimo caba. El a opta pa laga nan den cunucu mirando cu, si e yama Serlimar, nan ta cobr’e pa bay cu e porconan. Segun Geerman, nan a bis’e cu su porconan ta mal cuida, di cual e ta condena e ponencia aki. “Mi porconan ta bon comi”, asina Geerman a reacciona rib’e ponencia di tanto polis y City Inspector.
Polis a topa cu un porco di casi 300 kilo morto den e cunucu. Mas a leu Geerman a conta cu, pa su proximo dia polis a presenta y kibra dak di e cas di porco sin motibo. Despues di kibra e dak polis a bis’e: “bay drech’e awo si bo kier sigui cria bestia.” E cunukero ta lamenta e situacion, na 2011 el a haci denuncia ora a horta su bestianan, pero nunca polis a actua.
No obstante cu nan a bay cu e porco mortonan, pero a bay cu esunnan bibo tambe, e ta spera cu pronto e por haya su porconan bek y no den cura di un di personal di City Inspector of polis.
