Polis diadomingo merdia a atende un situacion fastioso den Boliviastraat. Un homber a bira malo den apartamento cu e ta huur, a pidi pa Ambulance bin atende. Ora e paramediconan di IMSAN a yega e cas, doño di e apartamento no kier a laganan haci nan trabou.
E homber malo mester a bay Hospital den Ambulance. E doño di e apartamento no tabatin comprension pa e situacion y tabata exigi placa di huur prome. E homber cu ta huur un “camber” parti patras di e cas lo ta di poco recurso y ta biba di pensioen y/of onderstand, no tabatin manera pa paga e momento ey e debe pendiente.
Ambulance a considera esaki un emergencia medico pa locual a pidi Polis bin atende cu e doño di apartamento cu no kier a rasona. Dos unidad di Polis di Oranjestad a yega e adres y atende cu e homber cu tabata stroba e huurdo di busca drechi pa su salud. Ruman di e homber a yega un rato despues pa purba intermedia den e asunto.
Na final Ambulance a logra atende cu e homber malo. Polis a splica tur hende envolvi nan derecho y caminda pa cana den e situacion cu a presenta.
