Donacion di 100 tas na muchanan den dificultad

Scol ta den cuminsa y ainda tin muchanan cu no tin tur cos pa bay scol. Pa esaki dokter di cas, dr. Aruna Tewarie Singh a haci un donacion special na e muchanan den dificultad.

El a opta pa haci donacion di 100 tas y haci 100 mucha contento. Algun luna pasa e dokter di cas a dicidi di parti bebida friu na e comunidad, pero esaki ta un tradicion di India. A parti 5 mil bebida unda cu e staff di Minister di Asuntonan Social, Glenbert Croes, a acerca nan p’e proyecto di yuda muchanan den dificultad.

Donacion di 100 tas di scol pa muchanan den dificultad

Posted by 24ora on Wednesday, September 2, 2020

A cuminsa cu esaki prome cu e situacion di COVID a dal Aruba duro y despues e parti economico tabatin efecto riba famia, nan a traha mas hopi pa logra haci e donacion. A logra finalisa e proyecto y duna 100 tas na muchanan den dificultad.

Minister di Asuntonan Social, Glenbert Croes, a gradici dokter Singh y e comunidad di Surinam pa yuda na e proyecto aki y duna 100 mucha un tas nobo. Prome cu e crisis di Coronavirus e situacion tabata dificil caba, pero awo e ta mas dificil. Di a ricibi esaki for di e comunidad di Surinam, ta significa hopi.

Dr. Singh a expresa di ta hopi orguyoso di su gesto di a duna tas na e muchanan cu tin hopi dificultad. E gesto aki ta uno chikito, pero ta spera cu den futuro e por haya mas oportunidad pa haci tipo di gesto chikito asina aki.