Don Flip Carnival Group, e aña aki a scoge e tema Tutti Fruti Cuties den e parada di blaas na San Nicolas. Penelope Tromp-Gomez, lider di grupo di Don Flip Carnival Group, a comenta cu nan tin un special cu ta bayendo hopi bon, cual ta 25 florin.
E mucha ta ricibi su pechi di Tutti Fruti, su t-shirt. E ta bay haya su blaas di fruta y un bril pa e por disfruta den e solo un tiki y tambe un tattoo di fruta.
A pensa e tema aki ta hopi leuk pa mucha y hopi atractivo. Fuera di esey tin un mensahe di conscientisacion cu e muchanan ta saludabel y cu ta leuk cu nan por jump den carnaval.
Parada di mucha
E tema di e aña aki cu a scoge pa e paradanan di mucha, tanto pa San Nicolas como Playa ta “Weganan di Mesa” (boardgames). Esey ta consisti di tur tipo di wega cu muchanan ta hunga na nan cas riba mesa, cu famia.
A pensa pa presenta e tema aki. Tin diferente tema riba caminda di e weganan di mesa. Pa masa, cual e grupo ta percura p’e, ta Monopoly, unda cu e muchanan lo bira e Monopoly Boys and Girls.
E trahe aki ta uno full cosi. Tin costureranan cu ta cose tur cos pa e muchanan. Ta hay’e special di 100 florin pa dos parada, caminda e mucha ta haya full trahe, headpiece y e muchanan ta jump bao di tono di Youth Extreme, cu a haci su comeback den carnaval.
Don Flip ta contento cu nan t’ey y cu nan lo sa di pone ambiente pa e muchanan.
Un grupo hopi conoci
No tin un premio cu Don Flip no ta faya. Semper ta nan meta pa haya e premio di masa y masa di ambiente. Nan tin e grupo cu ta traha cun’e, e lidernan, tin e banda cu semper ta join y tambe tin Joy cu su trein den carnaval, p’asina pone ambiente den carnaval.
Don Flip sigur ta bay pa e premio di masa cu mas ambiente.
Ki ora pa inscribi y informa
Don Flip ta activo riba Facebook. Nan tin un pagina special caminda cu tin hende constant bezig cu por atende cualkier pregunta. Of tambe kier haci reservacion pa e yiu, por contact via Facebook.
Of tambe na nan sede na Cas Ariba 25. Mundo Nobo bay ariba, yega na e crusada di e dam di Cas Ariba, man drechi. E prome cas na e crusada.
E ruta ta riba e pagina di Facebook, cu por hay’e tiki mas facil, pero por join anytime. Penelope tambe ta disponibel via 5926335. Por Whatsapp of yama pa cualkier informacion. Pa e grupo di mucha tambe, Penelope a menciona cu ta acepta un downpayment di 25 florin, ta tuma midi, cuminsa scoge e trahe y prome cu e parada, percura pa paga e resto, pa asina e mucha por join e grupo.
Mensahe
Na e mayornan kier a haci un yamada pa bin join. Laga e yiu experencia kico ta carnaval. Don Flip gusta pa e muchanan ta comodo. E grupo semper a sali grupo di mas ambiente y semper a percura super bon di e muchanan y e mayornan tambe por join hunto cu e muchanan.
