E ta naci na aña 2002 y e tempo ey caba el a bira masha popular den politica. Ta dia cu el a nace cu ex-Minister Presidente Nel Oduber a yama su mama como un “broedende kip”. Awe, e baby….cu entretanto a cumpli 18 aña….ta bay studia. Y ora el a kere cu su mama lo por compañ’e na paz, awo ta resulta cu e mesun MEP ta persigui su mama y ta pusha tur forma pa kibra nan viahe. Ta comosifuera cu pa henter su bida, politica a y lo sigui tin un impacto, solamente cu no necesariamente den un ambito positivo.
Tabata na aña 2002, ora cu Marisol Lopez a opta pa bay cu “zwangerschapverlof” cu tabata parce cu su reemplasante, esta Minister Presidente Nel Oduber lo tabatin asuntonan pa regla. E señora, pa cuida interes nacional y cuida terenonan di nos pais, a dicidi cu e no ta “meld ziek” y a keda traha y firma tur documento, aunke drumi den kraamafdeling y verloskamer na Hospital. Ora a puntra Nel Oduber riba su opinion cu e no ta “confia” su coleganan, el a contesta cu “een broedende kip moet je met rust laten”.
E tempo ey tabata un entrevista exclusivo cu nos coleganan Patrick Paskel y Nelson “Speed” Andrade a haci pa ATV y Diario (tempo cu e tabata un corant grandi ainda) cu Minister Presidente Nel Oduber pafo di misa catolico na Brazil. Tabata un santo sacrificio di misa dedica na Minister Booshi Wever cu e tempo ey a perde riba lama y nan a recuper’e sano y salvo. A bay yama Dios danki pa esaki pero na mes momento a los un “bom” contra Minister Marisol Lopez cu tabata sea hayando yiu of a caba di haya yiu. E entrevista ey a bira uno historico!
Pero….si a pensa cu e entrevista aki tabata kisas un dia menos bon di Minister Presidente di e tempo aya, ata despues di 18 aña, e mesun situacion ta presenta. E tempo aya, durante votacion pa cambia pensioen di Minister y Parlamentarionan, ata Marisol Lopez y Mervin Wyatt a vota hunto cu AVP pa drecha e sistema di pensioen. MEP a rabia y saca ambos na mal ordo for di partido. A cambia slot di porta y lastra ambos den prensa.
Marisol Lopez consecuentemente a bay riba lista di AVP y a bira Presidente di Parlamento. Na dado momento, diferencia di opinion cu AVP a pone bira independiente y den eleccion di aña 2017 el a participa cu POR como candidato number 3. E nunca lo por a spera cu na aña 2020, pues 18 aña despues, ora cu Dominique a caba scol y awor ta sigui studia na Hulanda, cu atrobe e ta hay’e den un situacion semehante cu su trabou. Tur hende lo a pensa cu locual a pasa…”a pasa caba” pero cu e realidad awe riba mesa por sinti cu locual a pasa, di berdad ainda ta andando!
E diferencia ta cu awor Dominique a bira adulto caba y e tin su mesun opinion. Ironico ta cu awe, e mes a bisa su mama, cu e ta contento cu su mama a compañ’e pa Hulanda pero di berdad e ta sinti cu su mama mester ta na Aruba pa e reunion. Como cu e yiu mes a encurasha su mama pa ta den e reunion publico di Parlamento na Aruba, awor Minister Marisol Lopez ta explorando tur forma pa logra subi avion y yega Aruba pa enfrenta cada un di e 21 miembronan di Parlamento cu tin pregunta pe riba dicon POR no tin confiansa mes den dje. E lo yega carga cu copia di documentonan cu ta na Landsrecherche caba, pa comparti cu Parlamento, ya tur cu vota lo bira sea complice di corupcion of nan ta para pa integridad.
Como cu e reunion lo pasa tambe via television y rednan social, comunidad tambe lo por sigui tur desaroyo di cerca pa asina biba cu e realidad y scucha samsam cu e Parlamentarionan, riba e maneho di e mandatario cu awor a causa cu no tin confiansa mas den dje. Tin hende ta hasta pensa cu Landsrecherche lo por pasa piki algun hende for di eyden mes na final di e reunion.
Marisol Lopez a yega di bisa den pasado cu el a entrega mucho di su bida na politica. Como mama e no ta facil, traha oranan largo siendo cu tin 2 yiu muhe pa lanta tur dia. Ora su yiunan a cuminsa cana, a dal nan prome stapnan, el a mira via potret pasobra e no tabat’ey. Awor cu nan ta mas grandi, el a compromete pa ta cu nan y no laga momentonan importante asina pasa pa via di politica. Pero, e mesun yiu a pidi’e pa “bay bin” y awor ta contempla pa cumpli cu deseo di su yiu mayo, pa para duro pa integridad y pa drenta sala di Parlamento caya den laira y sali cara na halto. Ta hopi sigur, cu no ta tur Minister ni Parlamentario sinta eyden lo no sali cu cara na halto despues di e reunion di diabierna!
