Dominicano ta denuncia paisano cu a estaf’e pero autoridad no ta haciendo nada

Cesar Morales ta un Dominicano cu ta trahando duro pa su placa na Aruba y awo e ta denuncia un persona cu a estaf’e. Te awe Morales no ta mira nada ta sali afo di e denuncia cu el a haci for di luna di april. Ta trata aki di un persona cu a priminti’e shelo y tera, su propio compatriota cu a kita basta placa for di dje.

Morales a dicidi di bin p’adilanti despues di a cana un caminda di cruz pa e haya su placa bek. El a bay hasta Ministerio Publico, Recherche, y hasta el a paga un abogado pa asina haya su placa for di un persona cu ta pretende di ta trahando den Gobierno, cu tin relacion cu Dimas y estafando mas hende.

Te aworaki, Morales a menciona, e persona cu e ta papiando di dje a estafa en total 6 persona. E mes a dicidi di bin p’adilanti, encurashando e demas personanan estafa, pa nan bay haci denuncia. Esaki pasobra e no a mira ningun resultado for di e denuncianan haci.

Ministerio Publico

Morales a bay Ministerio Publico unda cu el a topa cu un trahado, kende kier a yud’e. El a bisa cu el a manda e caso pa e warda di Noord y ainda no a haya contesta. Tin mas persona tambe, manera Morales, engaña pa un tal Leoncio Corona, kende ta e estafador. Te awor aki ningun hende a par’e, pasobra parce cu e tin inmunidad. Un hende cu ta bisa cu e ta saca tereno y permiso y ta bisa cu ta haci varios cos. Na final ta saca placa di hende y ora cu e no por haci nada, e ta paga 100, of 200 florin di e cantidad di placa cu el a cobra su victima, cu ta yega te hasta mas di 7000 florin. Morales ta keda enfatisa cu manera cu e persona aki a hort’e, el a horta mas hende. Y ta pa e motibo aki mes nan tin cu denunci’e y pa no tin miedo.

Mirando cu Leoncio Corona ta un Dominicano, un “tigre”, Morales ta bay t’ey spera riba dje. E ta spera cu autoridad tuma nota di e asunto. No solamente p’e, pero pa e demas hendenan cu Corona a estafa.

Prueba

Morales a hiba prueba na tanto recherche como Ministerio Publico y tur hende sa kico Corona ta haci, pero no ta par’e. Corona a laga sa, cu si nan gar’e mes, e lo dura dos dia preso, pero por ta lo sirbi di ehempel, pa no sigui estafando hendenan trahado, kendenan ta traha cu nan sodo ta gana nan placa y ilusiona hende cu nan ta haya tereno of permiso.

Tur loke Morales kier, ta pa e haya su placa bek.