Diaranson anochi, pa mas of menos 9:45 pm, un persona a pidi asistencia di polis cu maximo urgencia pa nan presenta na Club Universal. Na yegada di polis, nan no a topa cu e persona, ni cu e auto cu e tabata aden, esta un Nissan Cube colo blanco, pero no a para cu e buskeda.
Na altura di un scol na Sabana Basora, polis ta topa cu e auto y tiki mas pabao, a bin topa cu e doño di e auto, sclamando di dolor na su horea. Aparentemente algo mester a explota den e auto cu e consecuencianan ya menciona.
A pidi pa ambulance bin urgentemente pa brinda asistencia, mirando cu e homber no por a scucha nada tampoco y tabata gritando masha duro mes.
A dicidi e ora pa transporta e homber pa hospital pa asina ricibi tratamento medico avansa. Mientras tanto famianan a presenta y a bay cu e auto. Polis mes a keda circula den e bario pa mira si tur cos tabata na ordo.
