Despues di 7 aña den e funcion di Alto Comisario di Cuerpo Policial Aruba, mr. Adolfo “Dolfi” Richardson ta cla pa un otro reto y no ta interesa mas pa sigui na timon di e organisacion policial di nos pais. E no sa ainda kico e lo bay haci, aunke su deseo ta pa lanta un departamento nobo, estilo Hulanda, un “Nationaal Coordinator Terrorismebestrijding” (NCT).
E ta wardando e Gobierno nobo sinta pa e propone esaki na nan. Prome cu eleccion ya Korpschef a comunica su decision na Minister Arthur Dowers.
No tin mucho opcion pa tuma e posicion aki over. Den top di Cuerpo Policial Aruba awor tin Vanessa Tjon, Trudy Hassel y Irma Gordon, mientras cu Eric Soemers ta den funcion di Comisario interino. Dos hoben cu talento, conocemento, preparacion y experencia pa ocupa e funcion aki ta Robert Candelaria y Rocco Tjon, pero ambos a opta pa un carera politico y algun siman pasa a huramenta como Parlamentario.
