Dolfi Richardson lo conseha riba futuro di Andrew Hoo

6713

Ta berdad cu kier postula ex Altocomisario di Polis, Andrew Hoo, den un funcion nobo estilo “overkoepelend orgaan” riba DIMAS, IASA (Migracion) y Guarda nos Costa? Ta con ta haci awo pa paga Vanessa Tjon y Andrew Hoo den e mesun posicion cu e mesun salario siendo un ta traha henter dia y e otro ta na cas cobrando sin traha? Esaki ta preguntanan cu awe 24ora.com a haci na Minister di Husticia, mr. Andin Bikker, durante e conferencia di prensa di Gobierno. El a admiti cu Hoo ta cobrando na cas, pero a bisa cu ta buscando un tranou pe.

Kico ta e trabou nobo cu lo ofrece Andrew Hoo no ta conoci. Di acuerdo cu nos informenan, algun luna pasa Minister di Husticia a ofrece e funcion di Director di DTI, pero Hoo a nenga. El a studia pa Polis y no ta kere cu e lo por funciona den un trabou asina tecnico. El a gradici Minister pa e oferta pero e kier algo similar den husticia, manera su rol di Altocomisario tabata.

Dia 6 di april 2018, Andin Bikker a bisti Andrew Hoo su insignanan di altocomisario, durante un ceremonia special. Riba e dia ey Otmar Oduber tambe tabata presente, como Minster Presidente interino. E no a spera cu un aña despues, e mesun Hoo lo informa Procurador General di kehonan penal cu a drenta di corupcion contra Oduber. Y den forma abrupto mester a core cu Hoo for di su funcion, cu ayudo y sosten di Minister Andin Bikker. Ta e tipo di maniobranan asina, unda politica ta meti den nos sistema hudicial, ta haci cu Gobierno di Hulanda ta tuma decisionnan drastico pa garantisa integridad di nos sistema hudicial riba nos pais!

Awe sinembargo Minister Bikker, pa por kita un poco for di e pregunta, a bisa cu el a acerca e departamento nobo, Nationaal Centraal bureau Terrorismebestrijding, Veiligheid en Interpol (NCTVI), bouo encargo di ex Altocomisario Dolfi Richardson, pa nan duna Gobierno un conseho riba un posibel funcion pa Hoo den e aparato gubernamental. E mandatario a laga un poco espacio pa interpreta cu si ta eyden mes e lo kier hinca Hoo hunto cu otro ex funcionarionan halto di Polis, manera Dolfi Richardson y Altoinspector di Polis Fredson Panneflek.

Andre Hoo a studia na academia di Polis na Hulanda como “Master of Executive Policing” y despues a sigui su estudio di Hotel Management na Universidad di Las Vegas. Na april 2018 a instal’e como Altocomisario di Polis y na maart 2020 a bah’e for di tal posicion. E tempo ey tabata pa un supuesto “voice message” cu a manda pa un miembro di prensa relaciona cu e posicion anti-prensa cu Gobierno a tuma den e crisis di Coronavirus. Despues a resulta cu ta e investigacion penal contra ex-Minister Otmar Oduber a inicia den Polis y cu ta esey lo tabata e motibo “real” pa pidi su cabes.

E realidad awor ta cu Andrew Hoo ta keda bay na cas, el a keda cu su auto di trabou si, pero sin ningun responsabilidad, sin oficina y sin nada di haci. E Minister a schuif e problema awor den scochi di mr. Dolfi Richardson, pe bin cu un solucion den e asunto aki. No ta conoci si Hoo lo cana un caminda legal pa haya su funcion bek. Minister tabatin masha bunita palabra pa Hoo awe y a bisa enfaticamente cu el a haci un bon trabou y a mantene criminalidad bou control den su tempo. Dicon mester a kit’e e ora for di su funcion, e no a bisa. Esey obviamente ta duna suficiente motibo pa pensa cu Bikker a actua den nomber di otro hende, of a cumpli cu deseo di otro hende, ora el a baha Hoo for di su funcion di Altocomisario.