Docentenan ta nenga di sinta cu directiva di Colegio Arubano

2393

E situacion of problemanan entre docentenan y Stichting Middelbaar Onderwijs (SMOA) ta escalando y niun banda cu no kier duna comentario riba e situacion.

E diferencia di opinion entre e cuerpo di docente (casi 100) y e stichting SMOA ta hopi grandi y parce tambe un falta di comunicacion. Por corda e problema cu rector cu na final a dicidi di bay pa motibo di no por traha cu e directiva, siendo cu e cuerpo di docente tabatin un bon relacion cu ne. Pero tambe a haci diferente otro cambio den forma unilateral.

Docentenan tabata den un reunion awe den oranan di merdia pa atardi, pa discuti apertura di aña escolar nobo ora cu Monica Kock, un representante di SMOA a yega pa participa den e encuentro aki. E tabata insisti pa hiba palabra locual no a cay na agrado di e docentenan, kendenan a dicidi di “walk out” pa demostra nan malcontento.

Docentenan ta nenga di sinta cu directiva di Colegio Arubano

Docentenan ta nenga di sinta cu directiva di Colegio Arubano

Posted by 24ora on Thursday, May 28, 2020

A trata di papia cu representante di e docentenan Everick Rincones, kende no kier a duna comentario. Di parti di SMOA tambe e reaccion tabata “no comments”. Segun por a compronde e docentenan despues a dicidi di bay na sede di SIMAR unda nan por a sinti y delibera riba e situacion.

Presidente di Simar, Josephine Albertus, kende tabata participando den un reunion cu Gobierno riba Enseñansa no tabata na altura. Sinembargo  a expresa cu e docentenan a manda copia di un carta y a expresa nan disgustonan. “Nan a bisa di ta prefera cana nan caminda y ora cu nan ta cla SIMAR t’ey pa asisti nan.”