Docentenan di EPB ta preocupa cu e cambio abrupto haci door di SEPB sin consulta

Diaranson tabata tin un reunion entre docentenan di EPB y Simar riba e preocupacion den enseñansa.

E docentenan por a lesa via un carta nan preocupacion cu nan tin tocante di e decision abrupto cu directiva di SEPB a tuma. Segun Josephine Martilia-Albertus, presidente di Simar, si wak na cuminsamento di juni, nan a haya un carta unda a bisa cu tin un cambio minimo den e directiva. Despues, dia 21 di juni ultimo, cual ta tres siman despues, nan a haya un cambio drastico cual nan no ta compronde p’akico. Riba dje nan no ta envolvi nan tampoco.

E docentenan ta vocifera cu pa otro aña escolar tin dos director nobo. San Nicolas tin director nobo y EPB Hato tambe tin su propio director. Awo tur hende mester custumbra cu nan director nobo. Nan ta haya e ora cu mester mantene continuidad den e managernan. Nan por yuda tambe den e settlement di e director nobo. Pero awor aki directiva ta bin abrupto cu un cambio unda cu tur e managernan tambe tin cu cambia di nan Unit. Tin director nobo y maneho nobo. Riba dje tambe a bin cu algun proceso extra pa otro aña cu nan kier implementa. Ta cambio riba cambio, sin duna e docentenan tempo tampoco pa nan por aclimatisa.

“Cambio ta bon, pasobra esey mes docentenan ta bisa, pero sikiera cu e cambio bin cun’e den forma di proceso. Pone riba papel paso pa paso, unda e punto final ta. E ora por cana hunto pa yega na dje, pero no den transcurso di tres siman, e sindicalista a bisa.

 

Kico ta bay haci

Pa e motibo aki a dicidi di invita e mandatario a un reunion na EPB Hato, unda el a acudi tambe. Segun Martilia-Albertus, e Minister a scucha e preocupacion di e docentenan y a bisa cu e lo atende cu directiva. Diabierna awo e tin reunion cu nan atrobe. A urgi Minister pa papia den nan nomber y pidi e directiva bin scucha nan. E docentenan kier pa directiva bin pa nan tambe por tende pakico un cambio asina abrupto den un tempo asina cortico. Nan tambe kier vocifera nan preocupacion, pero directiva kier tur cos bay via carta. E docentenan ta haya si a bin un cambio abrupto asina, sin tuma cuenta cu nan, sikiera por bin presenta na scol, mirando cu for di dialuna te cu diahuebs, tur docente, tanto EPB San Nicolas, como di Hato, ta trahando aki riba e PLT pa otro aña. E ora ey tur ta hunto. Esey ta un bon momento pa directiva yega y splica nan pakico di e cambionan abrupto.

Para pafo

Un gran cantidad di miembronan di Simar cu ta docente ta para pafo na EPB Hato. Segun e lider sindical esey ta pa mustra nan disgusto pasobra nan no ta hayando oido. Tin cu mira e ora un otro manera pa por haya oido. Docentenan ta bin tur dia scol cu hopi energia y amor pa nan trabao, pero nan kier ta balora tambe y no cu ta bin cambio sin tene cuenta cu nan. Sikiera bisa nan dicon a tuma un decision abrupto asina.

Pakico

Simar ta contento cu Aruba ta ripara cu mester di innovacion, mester tin cambio. Pero loke nan ta lubida pa tin cambio, mester tin sosten. Pa bo haya sosten, bo mester envolve e hendenan concerni. Esey ta unda cu nan ta haya. “Ta biniendo cada bes cu cambio abrupto, sin tene cuenta y ta implementa algo. Door di haci asina, no ta bay haya sosten. Y si no tin sosten, ken ta bay cambia e maneho nobo. E docentenan ta esun cu ta carga ora cu bin cu innovacion, y nan ta lubidando esey”, segun Josephine Martilia-Albertus.