Docentenan Colegio San Nicolas rabia pa cambia sin ningun dialogo of splicacion

Docentenan di Colegio Aruba San Nicolas a tene un reunion di urgencia den presencia y na sede di sindicato SIMAR. Esaki a bini despues cu otro grupo di docente, di Colegio Arubano Playa, a tene un accion di protesta contra nan directiva.

E reunion di e grupo di docentenan aki no tin nada di haber cu e accion di mainta pero relaciona cu e hecho cu Minister a dicidi cu nan ta bay cay bou di e fundacion cu ta maneha De Schakel. E disgusto di mas grandi di e docentenan cu no a envolví nan den e proceso aki. “Niun hende no a papia cu nan. Siman pasa Minister a papia den Parlamento cu e kier dialoga, pero te ainda nada,” Presidente di SIMAR Josephine Albertus a bisa.

Docentenan Colegio San Nicolas den reunion extraordinario

Posted by 24ora on Wednesday, June 3, 2020

Por ehempel nan kier haya sa e motibonan pakico a tuma e decisión, kier mira e raportnan. Docentenan ta di acuerdo cu tin cierto sistemanan mester cambia, pero e forma unilateral di e forma cu esaki ta sosode. Esaki ta e caso tambe cu e docentenan di Pieter Boerschool, unda tampoco a duna informacion na e docentenan. Enseñansa ta importante y e docentenan ta hunga un rol importante den esaki.

E cambio ta encera cu no tin ningún posibilidad di un scol publico (HAVO) pa e muchanan di pariba di brug. E hobennan tin derecho pa haya enseñanza via di un scol publico. Awo Colegio San Nicolas ta uno publico y ta tuma tur mucha pero unabes e bay bou di De Schakel, nan por dicidi cu no ta acepta cierto muchanan.

Otro incertidumbre ta e contribucion di e mayornan cu normalmente den un scol publico ta hopi abou. Awo no sa nada di esaki y mayornan tin derecho pa haya sa kico e lo bay ta.

Tur esaki ta trece un falta motivacion bou di tur hende envolví. Si docente ta contento, les ta bay bon y e studiantenan tambe, el a bisa. Y a agrega cu loke e docentenan kier ta dialogo pa mira si e decision tuma ta bon.