A pidi carta, a pidi pa siguransa y a pidi pa compromiso di parti di Gobierno cu lo no haci e cambionan cu Minister di Enseñansa a anuncia den forma unilateral. “Nos a haya carta y nos a haya compromiso di Minister Presidente y Minister di Enseñansa den esaki, pa cual nos ta satisfecho y no tin necesidad mas pa manifesta”, asina Josephine Albertus, Presidente di Sindicato SIMAR a vocifera un rato pasa den un rueda di prensa extraordinario na nan sede.
SIMAR a cancela marcha di diaranson atardi, den cual nan lo a topa 2:00pm na ex-edificio di DOW pa hunto marcha bay Bestuurskantoor. A splica cu awe den dia a haya un carta firma pa Minister Presidente, den cual ta anula tur e decisionnan cu nan a pidi pa anula. Gobierno a compromete pa wanta cu e decisionnan aki pa 1 aña largo, pues te net prome cu eleccion. Pero asina mes e docentenan no a keda contento pasobra nan kier a mira anulacion di e “intentieverklaring” cu Minister Rudy Lampe a firma pa pasa scol over pa fundacion. Por ultimo e mudamento di Paso pa Futuro tambe no tabata mucho cla den e carta cu lo para tur cos.
Minister Presidente a invita SIMAR pa un reunion diahuebs awor pa clarifica e puntonan cu ainda nan no ta satisfecho cu ne. SIMAR ta yama Gobierno di Aruba danki pa e cartanan ricibi y cu a demostra comprension pa e peticion di e veld di enseñansa.
A gradici Prome Minister y Minister di Enseñansa a mustra di nan banda pa yega na un solucion pa cual a dicidi cu e marcha no ta sigui. Diaranson y diahuebs tin reunion cu Gobierno pa cual a pidi e veld pa warda resultado di e reunionnan aki. Diahuebs pa 6ordi atardi lo reuni cu e sector pa splica nan na ki palabracion a yega.
