Cynthia Lacle ta yiu di mayornan Arubiano pero e mes a nace na Hulanda. Pero e no ta lubida su raiznan cu ta leu di caminda cu e ta biba y e tin masha hopi famia bibando na Aruba. Na Hulanda e ta un DJ conoci den su circulo cu varios titulo riba su nomber, entre otro e miho DJ na Hulanda cual titulo no ta mucho tempo pasa el a sa di conkista.
E biaha aki, el a participa entre e 15 miho DJnan di mundo den e competencia “Queen of Mashups” pa asina haya e titulo mundial pa loke ta 2019 y e tabata apunto di logra esaki. El a sa di bay cu e titulo di segunda finalista, cual den nos bista sigur ta un logro sumamente grandi.
E competencia a tuma luga na Mumbai, India dia 27 di november ultimo, caminda cu SOS Nitelife, un plataforma exclusivo pa DJnan femenino, a host e di cuater edicion di e competencia aki.
E 15 top DJnan femenino di nos planeta a participa den e gala event aki. DJ Blondie for di Merca y DJ Neit Kaur for di India a sali ganado conhunto pa e di cuater World DJane Championship.
Campeon defensor DJ Natalia Moon (Australia) a sali como prome finalista y CJ Cynthia Lacle (Hulanda), hunto cu DJ Dicca Higgs (Polonia) a sali como segunda finalistanan.
DJ arah Farz (Singapore) tabata di tres finalista, DJ Linda Erfolg (Alemania) tabata di cuarta finalista mientras cu DJ Lisa (Ucraina) a sali como di cinco finalista.
E 15 DJnan talentoso for di varios parti di mundo, a sa di participa den e competencia y a sa di pone e escenario na candela cu nan musica. Na final, huesnan a scoge e dos ganadonan. E audiencia tabata encanta pa e tono di e musica popular toca pa e damanan talentoso tras di e console.
Huradonan cu a scoge e damanan ta DJ nan den nan propio genero entre nan DJ Suketu, DJ Notorious y DJ Nasha.
Un palabra di pabien ta bay na DJ Cynthia Lacle cu su logro na India y ta spera cu den un futuro cercano, e por deleita pueblo di Aruba cu su talento riba console.
