Discurso Nacional di Prome Minister Eugene Rhuggenaath

24ora.com ta bibo for di Willemstad, Corsou cu discurso nacional di Prome Minister Eugene Rhuggenaath relaciona cu e situacion di Venezuela.

Discurso Nacional di Prome Minister Eugene Rhuggenaath

Discurso Nacional di Prome Minister Eugene Rhuggenaath

Posted by 24ora on Wednesday, February 13, 2019

Awe nochi mi kier dirigí algun palabra na boso den mi di dos diskurso nashonal riba e tema di refineria. Ta importante aklará e desaroyonan den nos búskeda pa un partner statégiko pa nos refineria, i kon nos ta bai sigui kana pa salbaguardiá kuponan di trabou.

Pa mi papia palabra kla; funshonamentu di nos refineria awor aki i den futuro serkano, ta sumamente importante pa stabilidat i perspektiva di nos pais. Niun hende no por balotá e impakto ku kontinuashon di refineria tin riba kada un suidadano. Ni tampoko nos no mester balotá di ki embergadura nos ta papiando di dje aki.

Ta trata di un refineria ku ta sinónimo ku desaroyo di nos pais, pero alabes un refineria ku ta mas di 100 aña bieu. Un poseshon stratégiko, un poseshon di nos, pero tambe unu ku ta fragil. Un poseshon, ku na e momentunan aki, ta planta nos mei mei di un arena sumamente kompliká. Mi ta papia di un arena geo-polítiko i di interesnan di komersio global.

Ora mi a haña e mandato desisívo pa goberná nos pais, mi a asumí mi responsabilidat ku diligensia, konsiente di e embergadura di e trayekto pa segurá kontinuashon di refineria. Den hinter e proseso, mi a mantené tur miembro di mi gabinete embolbí. Tur ora ku mester, i ta por, a informá mas kompletu ku ta posibel parlamento, sindikatonan, prensa i komunidat en general. Teniendo kuenta ku ora ta trata kompanianan internashonal, mester kumpli ku palabrashonnan riba kiko i ki ora por kompartí informashon.

Mester enfatisá ku e trayekto pa segurá kontinuashon di nos refineria no ta unu ku a kuminsa ayera. Gobièrnonan ku a bini i bai, gabinetenan den diferente konstelashon a dediká nan mes na e meta aki. I nos ta sigi ku e batuta.

For di aña 2004, Refineria di Kòrsou a inisiá kombersashonnan ku nos partner aktual ku ta PDVSA. Bal refreská tur hende su memoria, ku a hinka hopi tempu den PDVSA pa por haña nan na mesa pa negoshá e terminonan. Pa basta tempu lidernan promé ku mi no tabata haña NI kontesta. Tin un èks-Promé Minister ku a bai te Miraflores, sin logra resultado deseá.

Mas resien, a hinka hopi tempu i sèn den negoshá k’un partner chines ku na promé bista a mustra perfekto. Kaba a resultá, ku ta un kompania ku no tin su asuntunan finansieramente na òrdu, te ku direktor di e kompania ta bou di investigashon di outoridatnan chines. Mundu kompletu por a tuma nota di esaki.

Ta un kaminda largu, intensivo i kostoso nos a bin ta kana komo pais.

Ora tempu tabata na nos fabor, nos a realisá e urgensia? I nos a analisá i balansá tur nos opshonnan manera debe ser?

Realidat ta, ku aworaki tempu no ta na nos fabor. I nos no tin e rekursonan na nos disposishon manera algun aña pasá.

No opstante, ami i mi gabinete, ta bai hasi tur loke nos mester hasi i ta bai usa tur loke nos tin na nos disposishon, pa nos logra un solushon pa nos refineria.

Pueblo di Kòrsou,

Na 2017 mi a realisá ku mi tin algun opshon. Mi por a sigui e kaminda di menos resistensia, aunke tin tur señal ku kos ta bai pega. Òf mi por a habri un kaminda nobo pa eksplorá tur opshon pa haña e mihó partner pa Kòrsou. Sigur ora ta trata un desishon ku ta komprometé generashonnan pa bini, mi no por skohe “the easy way out”. P’esei mi a skohe pa inisiá un proseso nobo.

Mi ta konvensí ku e proseso pa habri bidding pa nos refineria ta e kaminda korekto. Esei tabata e proseso mas transparente pa kana, kaminda kompanianan di rònt mundu, inkluso Chines, Venezolano, Hulandes i Merikano por a ekspresá interes den nos refineria.

Basá riba kriterianan stipulá, a sali 3 bid (oferta) i a skohe un ‘preferred bidder’; esta e mihó partido pa sigui kuné. A sinta personal na mesa ku e partido na 5 diferente okashon, te ku a yega na disposishon pa firma pa por sigui negoshá eksklusivamente. Nos tabata i ta prepará pa den negosashon por duna i haña otro, sigur mirando e balor i invershonnan kuantioso.

Ta duru i lamentabel ku despues di tur e esfuerso, e partido no a sigui i nos tin ku kontinuá ku e búskeda.

Tur esnan ku ta puntra, kon nos a resultá aki, esaki ta bal un reflekshon di nos tur.

Paso echo ta, ku tin 2 liña korá ku a bin krusa otro i ku tabatin hopi influensiá riba e resultado ku nos a keda enfrentá kuné.

E promé liña korá ta manera un olefante grandi den un kamber chikitu. Un berdat bergonsoso, pero tin ku papié: nos tin varios persona den diferente kapasidat, ku mester sa mihó, pero ku ta skohe konsientemente pa korupshon!

Den kaso di refineria, ya tin un investigashon kanando pa malversashon di plaka, i awor tin unu pa korupshon.

Ni ku e konosementu ku nos refineria tin un impakto grandi riba nos ekonomia i entrada pa famianan, ni asina a para ketu na e daño ku por hasi na nos pais.

Banda di korupshon, nos mester ta alertá pa influensia di personanan ku interes propio, ku a demostrá varios bes durante dekadá, ku nan vishon no ta sirbi interes di nos pais. Nan loyalidat no ta na Kòrsou.

A yega ora pa denunsiá kosnan ku ta robes..ku akshon! Ya ami a demostrá, ku mi lo ta e promé ku ta akudí na Ministerio Públiko pa hasi kualke denunsia.

E di dos liña korá, pa mi keda na e mesun ehèmpel di olefante, ta manera e proverbio afrikano ta bisa: “Ora olefantenan ta bringa, ta e yerba ta sufri. …ta nos pueblo ta sufri.

No ta imediatamente visibel pa e olefantenan grandi di e mundu aki, kiko tur ta nos interesnan. Pero nos refineria, huntu ku Bullenbaai, tin un balor agregá stratégiko, ku no t’asina asina ta trapa riba nos manera yerba. Nos mester kere den esaki!

Ta na nos, pa laga nos bos resoná i hasi konosí ki balor agregá nos tin serka tur posibel partner. Nos mes NO mester buta nos lomba kontra di muraya.

Nos mester ta konsiente tambe, ku bista di mundu riba nos, destrukshon i disturbio, no ta yuda nos kousa.

E pregunta kardinal ta, kon nos ta sigui awor den e tempu korto ku a sobra?

Huntu ku e ekspertonan internashonal, ya a eksplorá tur posibilidat ku kompanianan den e bid, i/òf partidonan eksterno, ku por ta un partner serio i konfiabel.

Den kontienda, nos tin tambe nos partner aktual PDVSA. E Gobièrnu aki a habri i a mantené un liña di komunikashon ku PDVSA. Nos ta dispuesto na negoshá ku PDVSA pa nan kontinuá operashon di nos refineria den añanan benidero. E kondishon ta, ku nos mester negoshá ku seriedat i nos mester por deliberá riba sierto terminonan nobo i mas bentahoso.

Mi por imaginá ki ansha i angustia trahadónan di Refineria Isla tin pa ku futuro di nan trabou, paso mi tambe tin sernan kerí ku ta depende di refineria pa nan pan di kada dia. P’esei mi por asta komprondé dikon sindikatonan a sali publikamente na fabor pa kontinuá ku PDVSA.

Nos tin e refineria di mas serka i esun mas adekuá pa refiná nan krudo, sigur awor ku otro refinerianan na Venezuela no ta funshonando optimal. Pero aworaki Venezuela tin problema pa saka krudo pa rafiná i tin beslag riba varios bienes i barkunan di krudo.

Netamente p’esei, ta parti di mi responsabilidat pa mi avisá ku sigui traha ku PDVSA den e situashon aktual, ainda kiermen: skohe pa inseguridat pa nos trahadónan di Isla. Salbaguardiá kuponan di trabou ta mi preokupashon prinsipal.

Aunke Gobièrnu no tin parti den operashon di Refineria Isla i e relashon laboral ku trahadónan, si yega momentu ku PDVSA no por kumpli, e ta bira un reto ku hinter nos komunidat mester karga. Nos mester ta konsiente ku esaki ta un riesgo realístiko, sigur mirando e sanshonnan ku ya Merka a anunsiá. Riba e retonan ku nos tin kaba, esaki tin un impakto devastador.

Gobièrnu di Kòrsou ta dispuesto pa fasilitá, den un kuadro legal, pa krudo yega Kòrsou pa nos refineria por operá i ya ta trahando riba e posibel opshonnan aki.

Mester menshoná tambe, ku kualke akuerdo ku nos drenta pa kontinuá ku rafinahe, nos tin e deber di wak mantenshon pa seguridat di nos pais i nos trahadónan na boka di trabou. Tambe nos tin e deber pa ku salú di tur suidadano i pa kumpli ku normanan di medio-ambiente. Esaki ta konta tambe den un ekstenshon di nos akuerdo ku PDVSA.

Gobièrnu tin e deber, pa ni maske nos tin nos plan A i B, nos prepará pa tur senario. Na mi enkargo, Refineria di Kòrsou (RdK) a sigui ku e ruta di “redevelopment” pa traha riba posibel desaroyonan nobo riba terenonan bashí. E enfoke ta, pa kuminsá eksplorá e posibilidatnan pa industrianan nobo òf ekspanshon di industria eksistente, por ehèmpèl sektor marítimo.

Esei ta tarea di un gobièrnu responsabel. Mientras ku p’awor nos ta keda enfoká riba refineria, nos no por sera nos wowonan pa oportunidatnan nobo i desaroyonan ku por krea mas kupo di trabou, aworaki i pa futuro.

Pues, RdK ta siguí enkargá ku e trayekto pa yega na un partner stratégiko i alabes traha riba e plan di mas aña pa desaroyonan nobo. Den e afan aki, RdK mester por sigui hasi uso di tur konsehero ku e tin na su disposishon. Nos retonan ta grandi i serio. Problemanan personal ku hende i nan manera di hasi no ta relevante. Kapasidat i Integridat…esei ta importante.  

Gobièrnu i RdK a mustra kontinuamente e disponibilidat pa inkluí sindikatonan i tene nan altanto i inkluí den e proseso. Ora tin mester, a informá empleadonan direktamente, i nos lo keda hasi esei.

Pueblo di Kòrsou,

Pa konkluí, mi kier boga pa tur hende keda trankil i mi kier segurá, ku nos ta bai usa tur loke ta na nos disposishon pa nos por yega na un solushon.

Mi ta garantisá, ku nos lo bati na tur porta, te ora nos logra!

Na kuminsamentu di aña mi a deklará den un spich..ku kada unu di nos mester reflehá si nos akshonnan ta kondusí na hiba nos mes i nos komunidat dilanti na un manera duradero. Ora mi a papia di e spil, mi tabata kiermen mi mes tambe. Den e akontesementunan di último siman, tabatin momentunan ku mi tambe mester a buta un spil dilanti mi kara. Mi no a primintí di ta un lider perfekto, pero si pa ta un lider humano, sirbidó, ku su kurason semper na lugá.

Mi a siña di mi mayornan, si bo faya, no tin berguensa den pidi despensa. I esei mi a hasi, mustrando respèt. I esei ta e úniko kos ku mi ta eksigí bèk.

Si tin un base pa dialogá, i esei ami a mustra, no por tin ofensa i atakenan personal den nos manera di trata. Lidernan sindikal sa, ku ni maske tatin momentunan tenso ku diferensia di opinion, ami semper ta duna kara pa por papia. Prinsipal ta ku nos tin un meta komún. I mas ku nunka, nos mester di otro i nos mester sigui den dialogó na un manera ku huntu nos por logra nos meta pa refineria.

Den politika, mi sa ku ta tur kos mi mester spera. Pero asta den wega polítiko, e akusashon ku ami, Eugene Rhuggenaath, ke sera refineria i kousa ku miles di persona ta pèrdè na trabou i hinka kasnan di famia den problema, ta unu hopi serio. I no na su lugá. Komo lider di pais, mi úniko kompromiso ta pa sali na vanguardia di bienestar di nos pais.

Nos tur ku ta kompartí un amor enorme pa e pais aki, sa ku bienestar di nos ruman ta konserní nos tambe.

No ta eksistí 1 komunidat kaminda tur hende ta kompartí mesun pensamentu i mesun perspektiva. Pero esei no ta kita ku hende mester por buta kabes huntu ora ku ta nesesario.

NO mester ta un kestion di ken ta gana òf ken ta pèrde;

Nos TUR ta pèrdè, si nos skohe pa konfrontashon, manipulashon i destrukshon

Ban akshoná kontra korupshon, kontra divishon i kontra violensia.

No opstante diferensia di ideologia, …ban bringa pa konbibensia

No opstante diferensia di opinion, …ban bringa pa komprenshon

BAN buska kiko ta uni nos i ban buska konfiansa den otro.

BAN siña Balorá otro i siña Kolabora ku otro,

BAN pensa ku tur por gana, P’asina Kòrsou tambe gana.

Ban bringa pa nos pais!

“Si ayera nos a kai, awe nos tin ku lanta para..” E eskoho ta na nos. Ta huntu nos tin ku sali afó. Ta huntu nos ta konstruí nashon.

Kòrsou, ban pa bai, pa nos Kòrsou..DEN GLORIA!

Dios Bendishonan un i tur i nos dushi Kòrsou.

Comments

comments