A skohe un direktiva nobo pa Corps Consulaire di Kòrsou den un reunion resien di miembronan. Karel Frielink, kònsùl honorario pa Alemania, president di direktiva.
E otro miembronan di direktiva ta Paul Pradin (kònsùl pa Fransia) komo visepresidente, Jan Van Belleghem (kònsùl honorario pa Bélgika) komo tesorero, Julie Tidey (kònsùl honorario pa Inglatera I Nort Ierland) komo sekretaria, Waleska Schumacher (kònsùl honorario pa Brasil), Henriette Agnes Daniel (kònsùl pa Surnam) i Pilar Awad (kònsùl pa republika Dominikana) komo miembro.
E Corps Consulaire di Kòrsou ta konta ku representashon di 31 pais. E miembronan ta kònsùl general, visekònsùl òf kònsùl honorario. Nan ta yuda siudadanonan di e paisnan ku nan ta representá i ku ta biba na Kòrsou òf ku ta di bishita ku asuntunan hurídiko i konsular. Ademas nan ta stimulá un bon relashon entre Kòrsou i e pais ku nan ta representá.
