Recientemente director di STC-Group Albert Bos a haci un bishita di cortesia na Minister Plenipotenciario Guillfred Besaril. Tambe presente tabata Jacky Roga di e departamento di Economische Acquisitie di Arubahuis.
Sr. Bos a papia cu e mandatario riba e cooperacion entre STC-Group y diferente instancianan na Aruba, manera Universidad di Aruba (UA) y Directie Scheepvaart (DSA).
Na 2014 STC, UA y DCA a cera un areglo di cooperacion pa cuminsa cu trainingen pa manager Port Operations na Aruba. STC-Group ta bezig cu UA pa proximamente un biaha mas cuminsa cu cursonan riba tereno di logistico pa trahadornan den deposito. Investigacion haci na Aruba a saca afor cu mas cu mitar di companianan na Aruba ta activo riba tereno logistico.
Tambe tin combersacionnan cu EPI pa estudionan pa assistent di doktor y dentista. Banda di esey ta e intencion pa dos docente di EPI bin Hulanda y wordo entrena riba terenonan cu ta di nesesidad na Aruba. Intencion di STC ta pa firma un MoU riba esaki otro aña.
Minister Besaril a señala cu na Aruba lo mester bin mas informacion na e scolnan riba profesionnan cu ta nesesario na Aruba. Pa es motibo ey Minister Besaril ta di opinion cu ta hopi imporante pa su persona – manera ela haci na juni y november ultimo – duna informacion na e alumnonan pa asina nan por haci un mihor escohencia pa cu un estudio.
E mandatario a informa sr. Bos riba e maneho di Gabinete Wever-Croes cu ta pone e ser humano central y tambe pa trece un balansa entre e desaroyo economcio y social, manera introduccion di e Crisis Plan Social. Banda di esaki Gobierno ta pone enfasis grandi riba innovacion y stimulacion di e sector primario.
Na final sr. Bos a gradici minister Besaril pa e bunita recepcion y a haci un invitacion na sr. Besaril pa bishita e facilidadnan di STC-Group na Rotterdam.
