Presidente di directiva di Parke Arikok, sr. Fredis Refunjol, tabata tey presente durante un reunion hunto cu e trahadonan.
El a splica cu e reunion a bay hopi bon. Hopi punto a bin p’adilanti relaciona cu e posicion huridico, pero tambe e ambiente di trabao, plannan cu tin pa futuro cu e parke.
Masha hopi pregunta a cay. Tabata un reunion sumamente largo, pero por lo general hopi bon. Tur hende por a vocifera loke ta nan deseo y expectativa. Por a splica exactamente con e directiva nobo ta, con e sistema cu parke ta bay funciona den futuro. Tambe tin decisionnan cu a tuma. Esaki ta e di tres biaha cu a reuni cu tur e trahadonan. Tabata algo unico pa nan pasobra nunca nan tabata tin e oportunidad eynan.
Pa loke ta esnan cu ta afilia na un sindicato, tin di compronde for di SEPPA cu tabata tin varios mal contento. Pero tambe tin di compronde cu directiva lo reuni cu e sindicato.
Refunjol a splica cu tin un contacto regular. Tabata tin dos sindicato na parke, tabata tin un referendum caminda cu SEPPA a gana. Intencion ta pa mas lihe cu ta posibel negosha un contracto colectivo cu tur e trahadonan di Parke, di forma cu nan ta bay cay bao di uno y cu nan ta den servicio di parke Arikok.
Norman Kuiperi, miembro di raad van toezicht y Tesorero di directiva di Parke Nacional Arikok, a splica cu aña pasa, ora cu corte a apunta un bestuur nobo, a señala nuebe punto di urgencia cu mester a trata den parke.
Como cuater pa cinco ora sigui a trata riba puntonan manera pago y ahustacion di salario di tur e empleadonan.
A bin haya file cu tabata tin 12 aña para, sin cu nada a haci cu nan. Esey ta e prome cos cu a haci.
Kuiperi a sigui splica cu nan a pidi, como un fundacion, un referendum caminda cu SEPPA a sali gana. Ta den continuo contacto cu SEPPA pa prepara e negociacionnan y contracto colectivo.
Speransa ta cu den un termino relativamente cortico por yega na un contracto colectivo. Tin un bon relacion cu SEPPA pa awor aki y semper ta bay tin mal contento cu cierto puntonan.
Pero esey ta cuestion di sinta na mesa, dialoga y yega na un acuerdo. Pero tin hopi cos mas pa bay drecha pa tur e empleadonan.
E puntonan cu nan ta menciona, ta puntonan chikito cu por drecha y lo bay drecha nan. Esey ta e intencion di e directiva.
Importante ta, e contacto ey. E directiva anterior, e contacto aki no tabata tey cu e sindicatonan.
Kuiperi a splica cu e no sa kico e relacion tabata cu e directiva bieu, pero e no tin tempo pa bay wak atras. E ta gusta sinta na mesa y debati y discuti cu ken cu ta. Den e caso aki cu e sindicato. Pa por yega na un acuerdo, pa bentaha di e fundacion Arikok.
Na final, dilanti tur hende lo bay. Ningun hende lo bay atras. Ta cuestion di sinta na mesa discuti, wak orario, wak shift, wak breaks, wak uniform. Tur e detayenan chikito, ta cos di sinta na mesa, y yega na un acuerdo.
