Miembronan di directiva y miembronan ta rabia cu presidente di New China Club, cu ta un cooperativa, cu ta nifica cu tur e miembronan ta doño di dje.
Henter e siman aki tabatin un discusion entre e miembronan di directiva y e president William Cheng. Varios biaha polis a bay na e club riba ex Sasaki pa intermedia. Esey tabata e caso diasabra mainta atrobe.
Despues cu miembronan di directiva a dicidi di yama un reunion, abogado di e president a acudi na e sitio pa cambia slot di e porta. Pero esaki ta algo cu e miembronan di directiva no kier permiti, a menos cu nan tambe haya un copia di e yabi.
Algun di e miembronan di directiva presente a cuestiona di con di repente awo mester pone un guardian a e edificio, cu semper tabata accesibel pa tur miembronan, sea pa reunion of practica deporte. Ora cu nan a bini eyden e siman aki, un di nan a splica, a constata cu a bay cu tur inventario di e oficina. “Si bo kier bira president bek, di con bo a bay cu tur cos. E president tin miedo? Di con e mes no ta bin enfrenta nos aki,” Yihua Zhao, un di e dirigentenan presente, a puntra.
Segun otro miembro a bisa, nan statuut ta bisa bon cla cu un persona por sinta solamente dos periodo, locual ta nifica cu William Cheng no por bira president mas. E ta sinta for di 2015. Tambe nan statuut ta bisa cu e eleccion mester tuma luga, prome cu aña nobo Chines y entrega e yabi na e directiva nobo riba e prome dia di aña, cu tabata 13 di februari. Pero esey no a sosode. For di prome cu e fecha caba nan a cuminsa cuestiona di con no ta yama e reunion.
A splica tambe cu debi cu e president no a yama e reunion, e directiva a haci e convocatorio pa diadomingo, 21 di februari, 2021. Nan ta pidi tur hende pa ta presente pa 9.30 di mainta. E reunion lo sigui, cu por habri of cera, paden of pafo.
Den e ultimo reunion e siguiente personanan a forma parti di e directiva: Tat Yan Cheng, Yihua Zhao (Miembro di directiva); Liqiang Chen (Secretario) y Dilong Alan Wu (Tesorero).
