Normalmente tin 7 miembro den Hunta di Supervision di Aruba Tourism Authority, pero como cu e 3 miembronan apunta pa Gobierno anterior, a keda solamente cuater activo. Ta net e minimo cantidad di miembronan necesario pa por sigui maneha e entidad di turismo. Ta tur cuater miembro den “board” a aproba e peticion di gerencia di ATA pa continua cu e sponsorship di e auto di careda “Team Aruba” na Merca. Esaki pa aclaria e critica di Minister di Turismo comosifuera cu ta “board” a djis presenta un idea pa sponsor.
No ta prome aña, sino ta di 15 aña caba cu ATA, di tempo cu e tabata Departamento di Turismo bou Minister Eddie Briesen tabata sostene e ekipo aki. Den casi 8 aña di Minister Otmar Oduber tambe a sigui sostene. Aña pasa a patrocina cu $223.500 y a haya bek casi 1.5 miyon dollar na cobertura den media. Asina gerencia di ATA a manda pa su Hunta di Supervision, pidiendo pa renoba e contract e aña aki atrobe.
E Hunta di Supervision di Aruba Tourism Authority tin actualmente 4 miembro activo, cu ta Lissete Malmberg di De Palm Tours, Alex Niewmeyer di Divi Resorts, Janien Huistra di Renaissance Resorts y Marieta Ras, apunta como Presidente dor di e 6 miembronan, pues 3 di Gobierno y 3 di AHATA. Si e tambe a retira ora Gobierno a cambia, lo a hinca ATA den basta preta, pasobra lo no tin un board completo. 
E problema pa nombra e 3 miembronan nobo di Gobierno ta cu e conseheronan di Minister Dangui Oduber a haci fout na mas di un ocasion den e decreto gubernamental, cu consecuencia cu Gobernador a mande bek pa nan corigi. Parce awe a firma nan, despues di 8 luna. E miembronan di Gobierno lo bira Cisco Quant di Tiera del Sol, Maarten Jan van Romondt, entre otro di Tiera del Sol y Jean Marie Bisslik di APFA. Ningun di nan cu mucho experiencia den e sector hotelero.
E sistema di patrocinio di Aruba Tourism Authority ta funciona di e siguiente forma: ATA mes ta evalua e peticionnan. Esunnan cu pasa nan propio “screening” ta pasa pa Board pa aprobacion. Despues cu Board vota na fabor e ta bay pa Minister, si e suma ta surpasa 100 mil florin. Asina tambe a bay den e caso aki, pues e CEO di ATA a presenta e proyecto pa aprobacion, e 4 miembronan di Board a vota UNANIMENTE pa e patrocinio y a mande Minister pa su decision final. Pues nada aki di un solo persona a purba pusha e sponsorship, simplemente asina cosnan no ta funciona den ATA.Relaciona cu e critica di Minister Oduber, cu Marieta Ras tin conflicto di interes pasobra e tabata traha como Consehero di Minister Mike de Meza, nos a compronde cu den tempo di Minister Otmar Oduber tabatin Myrna Jansen den board representando e mandatario. 
Cu e declaracion di e mandatario ta mustrando hopi cla e metemento directo di politica den ATA, lubidando cu e motibo cu tin 3 miembro di AHATA eyden ta netamente pasobra nan a distancia di fondonan cu antes tabata bay na nan, cu awor ta bay pa ATA. Nan rol ta pa sigura cu e fondonan di mercadeo di turismo ta bay dedica na e proposito ey mes. Cu Minister ta opta pa dedica e fondo aki mara na emocion of afiliacion politico, sin duda lo bay haci e funcionamento den ATA masha dificil.
