Directiva cu ta maneha Colegio Arubano ta nenga iregularidad den fondo di buki

492

Den un declaracion por escrito directiva di Stichting Voortgezet Onderwijs Aruba (ex SMOA) y ta reacciona riba un articulo cu a sali den un matutino diasabra 30 mei 2020

SVOA ta bisa di a tuma nota di un comunicado cu a sali den un matutino diasabra 30 mei ultimo tocante conflicto di interes den Colegio Arubano. SVOA ta lamenta cu informacion eroneo ta sali den publicidad, “atachando no solamento nos Bestuur pero tambe nos empleadonan sin busca pa sa con en realidad procesonan interno ta wordo canalisa.”

Specificamente pa loke ta e fondo di buki (boekenfonds), nan ta bisa,  tur aña enberdad ta manda pidi oferta na diferente companianan local y na Hulanda door cu tin diferente editornan. SVOA nunca a pidi oferta ni tawata tin intencion di pidi oferta cerca of via di ningun miembro di Bestuur.

SVOA ta cumpli cu reglanan stipula pa ley di contabilidad y alabes esey ta wordo controla tur aña pa un compania registra di contabilidad den cuadro di “good governance”. Despues cu bukinan financiero di SVOA wordo controla y aproba esaki ta wordo entrega na Minister di Enseñanza, Ciencia y Desaroyo Sostenibel, Departamento di Enseñansa, Departamento di Finansas, Algemene Rekenkamer y Centrale Accountantsdienst.

Ultimo esaki a sosode na aña 2019 unda a entrega e raport financiero pa aña 2018 y na e momentonan aki SVOA ta finalisando e informe pa aña 2019. “SVOA su empleadonan semper a traha naar eer en geweten y no por permiti ningun irregularidad financiero,” nan a termina bisando.