Na Alto Vista tin un tereno cu tin mas cu 100 aña den man di famia de Cuba. Un tereno cu a pasa di generacion pa generacion y awo ta den man di e bisanietonan di esun cu a haya e tereno originalmente. Pero pa nan sorpresa, DIP a dicidi di kita e tereno aki for di e herederonan.
Dialuna den oranan di dia a presenta na e sitio personal di DOW cu ekiponan pisa y hasta cu polis, siendo cu ningun hende a lanta cu e trahadonan. Polis a yega cu sirena manera cu ta un problema grandi tabatin. E tereno aki destina inicialmente pa planta mata mester a wordo cambia, pasobra e awa den subsuela tabata salo pa cual nan a bisa cu no por planta pero mester bay na cria di pesca.
Segun e famia a splica den combersacion cu 24ora.com, for di aña 2011 nan a haya permiso di Minister Benny Sevinger pa construi cierto cosnan riba e tereno cual ta destina den e trabou di cultivo cu nan ta haci eyriba. Inclusive, Departamento di DIP tabata na altura di tur loke tabata pasando y e permiso otorga door di Minister Sevinger.
Pero di repente na 2018 nan a bin ta confrontando hopi problema. Mas ainda despues cu un Hulandes bibando den e area, unda cu nan ta drenta pa haci trabou riba e tereno. Continuamente e Hulandes aki ta keha na DIP y cerca Minister.
Asina a cuminsa cu un perstermento y no ta respeta ningun di e documentonan legal cu nan tin den nan man. Nan ta bezig cu Abogado for di 2013 y DIP no ta ni contesta e Abogadonan.
E tristo ta cu DIP mes a laga nan haci e trabounan, despues cu nan a bin wak e luga, y pa de repente tuma e decision pa para e trabounan.
E herederonan den declaracion duna a bisa, cu si DIP kier kita e tereno for di nan y destrui tur loke nan tin pone riba dje, nan mester paga famia. Ta masha hopi placa a inverti den e tereno aki y inclusive cu tin un container cu hopi material den dje.
Den e ultimo contacto cu nan tabatin cu DIP a keda palabra un reunion pa diaranson, 11 di september awo.
E problema cu DIP ta señala ta cu e famia a pasa e limite di e tereno, pero segun Ruben de Cuba, nan tin un suituatieplan cu ta data di 1945, cual ta wordo nenga door di DIP.
Funcionarionan di DIP hasta a bin midi pero a laga e situacion mescos. E unico reaccion despues ta haya cu lo hala e tereno aden, pasobra a traha ilegal riba e tereno. E famia ta nenga cu ta huur e espacio. E ta simplemente un area cu nan ta uza pa ora hendenan ta bin traha eyriba.
