Tur caminda rond mundo, no ta solamente na Aruba pero tur caminda hubentud ta bao di atake di rebeldia, droga, violencia, falta di respet pa mayor, hasta meti den baho mundo, y actividad terorista.
Pero Dios a avisa nos di esey, pero hopi hende no ta tene cuenta, nan ta djis kere cu e cos ta facil y tur hende ta papia di mucha malcria, sin wak kico e enemigo ta busca pa haci. Pero Beibel ta avisa y siña nos lo siguiente:
Punto uno: 1 Pedro 5;5; Boso hobennan mescos sea sumiso na boso ancianonan, (no solamente den Iglesia, pero na cas tambe , esey ta nifica na bo grandinan) y bisti bo mes cu humildad.
Aki nan e obediencia di hubentud na mayor ta mustra su importancia, pasobra desobediencia ta lanta Orguyo , pero tambe e ta demostra cu Dios ta resisti e orguyoso y duna gracia na e humilde, p’esey e palabra ta bisa bisti bo mes cu humildad.
Punto dos: 1 Pedro 5;6 Humiya boso mes anto bao di man poderoso di Dios pa E por halsa boso na e tempo apropia. Esey ta nifica no hunga grandi, keda trankil, no purba aparenta mas grandi cu bondad, no bay den caminda di hende grandi, tira boso preocupacion riba Dje, Dios sa tur cos cu hobennan ta pasa den dje. Y Dios mes lo cuida di boso.
Punto tres: Sea sobrio, sea alerta , Boso adversario e diabel ta cana manera un leon cu ta gruña buscando ken e por Devora. Aki ta caminda tur mayor mester para keto un rato y cuminsa pensa riba nan yiunan. Pasobra bo yiu tin un enemigo invisibel cu ta busca bo yiu pa mata. Y e por disfrasa su mes den hopi cos, den mal Amistad, den droga, den alcohol, den bruheria, den satanismo, den pelicula vulgar, of pelicula satanico, Cartoons, den orguyo, den envidia, den falsedad, den rebeldia, etc.
Como mayor bo mester tene cuenta cu ken bo yiu ta anda, no ta tempo mas pa permiti bo yiu ta cana drumi na cas di amigo, amiga, tio, tanta, bisiña, padrino, madrina, etc , pasobra e tempo ta malo, y e influencia satanico ta domina tur esnan cu no conoce Dios y tambe esnan cu ta den Señor pero no ta tuma su palabra na serio. Nos ta mira cosnan straño ta sosode riba nos isla. Esey ta pa tur hende realisa cu nos no ta bibando den tempo facil, pasobra tur e cosnan aki ta para skirbi. Y aunke ley humano ta tarda pa tuma un decision pa aumenta castigo, abo como mayor ta prome yama pa bay den presencia di Dios pa bo yiu.
No sinta bisa cu esaki ta cosnan di ultimo tempo, pero lanta ariba tuma curashi den e oracion y palabra di Dios pa saca bo yiu for di den gara di e enemigo. Mescos cu ora gasolin ta cerca di caba den bo auto bo ta bay gasstation, asina tambe ora bo mira bo yiu ta flakea, lant’e bek cu oracion.
Punto cuater; Ma resistie , firme den boso FE sabiendo cu boso rumannan den henter mundo ta pasando den mesun experiencia di sufrimento.
Con bo ta resistie den bo fe , haciendo oracion, combersando cu bo yiu, guia bo yiu, conseha bo yiu, vigila bo yiu, trata bo yiu bon, pone tempo pa bo Famia, haci oracion den famia, lesa bijbel den famia, y mas cu tur cos wak pa bo tin un Iglesia cu bo ta bishita cu henter bo famia, caminda boso por alaba Dios hunto como Famia. Corda bon cu bo no por bringa diabel den carni, of miho bisa den bo propio forsa, solamente bo por den e nomber di Cristo Hesus.
Si bo sa cu bo yiu ta bao di atake, no tira gasolin riba candela, Evita discusion y palabra di ofensa, pasobra bo sa y ta para skirbi di unda e atake ta bini, y bo sa cu mas debil un hende ta den fe mas facil e ta pa e enemigo atake.
Enemigo no tin miedo di estatura, ni gordura, ni tampoco delega, locual e ta busca ta pa heridabo alma y bo spirito, esey nos mester tene cuenta cu ne. Corda riba Juan 10;10.
No cana busca e diabel riba caya cu cacho y rabo y forki pasobra bo no ta bay topa cu ne, masha tempo el a cambia paña, y e porta disfrasa den un homber cu bon tipo, of un muhe bunita, of hasta un mucha cu ta hala atencion di tur hende, pasobra caminda e enemigo haya porta habri eynan e ta drenta.
Un yamada na tur mayor, haci oracion, ayuno, vigilia, pa bo yiu, pasobra yiu ta keda yiu pa semper, nos ta responsabel pa nos yiunan, pa pone nan riba bon caminda di Dios, y hasta ora nan desvia for di e caminda, laga nos oracion ta semper cu nan den tur cos.
Mayor corda cu nos tur ta avisa, p’esey laga nos ta cauteloso, y mantene nos Oracion.
Sea bendiciona.
Skirbi pa Pastor
Marcel Balootje.
