Despues di varios anuncio den medionan di comunicacion riba e pago di impuesto pa vehiculo di motor, a yega e ultimo siman cu “contribuyentenan” (pueblo) por paga sin haya un multa. Manera ta conoci: si bo no paga bo impuesto di vehiculo di motor prome cu 28 di februari, lo bo haya un multa di 50% adicional riba bo tarifa normal. Aki ta sigui e localidad y e orario di unda y ki ora por paga.
Oficina principal di DIMP na Camacuri: 7.45am – 11.30am/12.45pm – 3.30pm
MFA na Noord, Paradera & Savaneta: 8.00am – 3.00pm
MFA Sta. Cruz & Hulpsbestuurskantoor na San Nicolas (HBK): 8.00am – 11.45am/1.00pm – 3.00pm
Personal di DIMP ta cla pa brinda servicio na tur contribuyente. Na oficina di DIMP na Camacuri lo tin un total di 6 cahero, na e oficinanan di MFA lo tin 2 cahero y na HBK San Nicolas lo tin 1 cahero. E proximo personanan aki tin preferencia pa haya e servicio prome: personanan 60 +, mama na estado y mama cu baby recien naci. Mirando cu ta un custumber cu mayoria biaha personanan ta paga na ultimo, a opta pa pone un team special pa percura si un hende bira malo den un di nan salanan na DIMP y tambe extra vigilancia pa mantene ordo den edificio mirando e multitud di hende cu ta bin paga na ultimo.
Kier a recorda un biaha mas e reglanan principal na momento cu ta bin haci pago, no ta permiti ningun hende cu pechi bisti, tampoco bril di solo y mucho menos filma den edificio. Ta stimula personanan pa paga “online”, hopi mas facil, efectivo y evita cu bo para den rij largo na momento di pago. Tur e anuncionan aki ta pa motibo cu e cifra ta sumamente halto di personanan cu no a paga nan impuesto di vehiculo di motor. Tur MFA y HBK por atende un total di maximo 300 persona pa dia.
Hopi importante: Un persona por paga MAXIMO 3 impuesto di vehiculo di motor.
