Alan Howell, Parlamentario di partido POR, a haci un apelacion fuerte na gobierno pa cumpli cu e pueblo di San Nicolas y e decision a cay unda cu a cumpli cu su peticion.
Gobierno tin un oficina auxiliar na San Nicolas y e area unda mester paga cuentanan di utilidad a keda habri sinembargo, e parti unda mester haci pagonan pa Departamento di Impuesto si tin basta tempo sin funciona.
E Parlamentario di San Nicolas a haci apelacion na gobierno, y a duna nan dos luna di tempo, pa cumpli cu e pueblo di San Nicolas. Esaki ta nifica pa habri bek e seccion di DIMP, unda por ehempel por paga BBO of number di auto, etc.
El a caba di haya e bon noticia for di minister di finanza Xiomara Maduro cu e seccion aki ta habri atrobe dia 26 di januari awo. E biaha aki e ta habri den un parti di Postkantoor.
Howell ta hopi contento cu e noticia aki, pasobra hopi hende grandi mester coy bus y bay te Savaneta pa por cumpli cu nan obligacionnan.
