DIMP: Na massa contribuyentenan a bin busca nan plachinan di number

Pa 5 siman caba Departamento di Impuesto (DIMP) a organisa un drive thru pa contribuyentenan por pasa busca nan plach’i number. A organisa 4 drive thru y awo a organisa un walk in awe diasabra.

“Pa DIMP esaki a bay bon y hendenan a yega na cantidad pa busca nan plach’i number”, asina mr. Luenne Gomez-Pieters, Director di DIMP a splica. Awo a cuminsa cu numbernan for di 30001 te cu 50000 pa automobilistanan por busca nan plachi entre 9:00am te 1:00pm non stop. E siman cu ta bin lo sigui cu e numbernan aki entre 7:45am pa 11:30am y 1:15pm pa 5:00pm.

E feedback cu DIMP a ricibi for di mayoria contribuyente ta cu nan a gusta e drive thru mas cu e walk in. No solamente nan ta den conformabilidad den nan auto, pero a nota cu tin dificultad pa para largo of cana. A cuminsa parti e prome plachinan den fase, departamentonan di gobierno a haya oportunidad pa manda un lista y sector priva a manda nan lista den e di dos tanda.

DIMP: Na massa contribuyentenan a bin busca nan plachinan di number

DIMP: Na massa contribuyentenan a bin busca nan plachinan di number. Click link pa mas https://24ora.tv/2NXYAp3

Posted by 24ora on Saturday, July 4, 2020

E di tres tanda a cuminsa dia 13 juni cu un drive thru y a resulta un exito rotundo. E tabata un trabou duro, pasobra hopi hende di DIMP tabata riba pia pa por a brinda un bon servicio na contribuyentenan. A sigui parti plachinan na tur Taxi, DT, O, T y awo ta den plachi A. A yega 50 mil plachi total. Segun Gomez-Pieters, contribuyentenan mester tene nan mes na e yamada pasobra no por yega cerca nan cu un number cu no a saca for di reki. Pa busca e number mester tin e comprobante di pago di DIMP, pasobra tin cliente ta yega cu comprobante di pago 2019 pero ta partiendo plachinan di 2020. Tambe percura p’e seguronan ta valido, pasobra tin cu no tabata na ordo.


Despues lo sigui cu e numbernan di 60000 pa 80000 y ta kere lo yega na nan aki 2 siman. Esnan cu nan numbernan a pasa caba, ta pidi pa tene pasenshi, asina el a bisa. Aki 2 siman DIMP lo haci un yamada general atrobe pa tur cu no a busca nan number riba e fecha indica, cu nan por haci esey riba e fecha ey ainda.