Hopi biaha nos por mira riba caya auto cu plachinan di number traha di papel of cu sticker. Departamento di Impuesto sigur ta tuma nota di esaki. Segun Meverly Romano, vocero di DIMP, sea via medionan social, y tambe automobilistanan atento ta informa y ta manda DIMP potret tambe di plachinan falso. Sea cu e ta un papel, carton of sticker, ta manda e potretnan y ta pasa e datonan directamente pa e team investigativo FIOD.
Nan ta encarga pa bay haci mas investigacion riba e caso. Pero FIOD no ta actua su so. E ta actua tambe den cooperacion cu Cuerpo Policial. Si mester FIOD lo bay, depende si di e factornan, na e sitio y e lo tuma e plachi falso den beslag y tambe e persona ta bay haya su mes envolvi cu Ministerio Publico.
Esaki ta un asunto hopi serio segun Romano. Falsificacion di plachi, core cu un plachi cu no ta esun cu Departamento di Impuesto a otorga, ta completamente ilegal. Entrante e aña aki Departamento di Impuesto no ta dunando carta di permiso mas pa un hende laga traha plachi su mes ora cu no tin plachi den stock. A elimina esey. E desaroyo cu tabata tin antes cu e hendenan toch tabata tin carta cu nan tabata tin mag di traha plachi nan mes, no ta valido mas. Por ta ainda lo ta pensando esey.
Pero p’esey tambe cada bes ta bolbe bisa cu plachinan traha door di cualkier otro persona, no ta valido. Bao di ningun condicion nan ta valido. Ta pone hopi atencion riba esey. Ki melding cu haya cu tin un plachi falso, DIMP ta tuma e accion, hunto cu FIOD, hunto cu Cuerpo Policial y posiblemente, si e caso mester bay mas leu, Ministerio Publico tambe ta envolvi, y probablemente e automobilista ey lo hay’e cu un straf. Lo castig’e pa esey. Esey ta completamente contra di ley, ta un falta di respet pa nos leynan. E ta un falta di respet tambe pa e automobilistanan cu si ta cumpli, cu si ta percura pa nan belasting ta paga, nan seguro ta paga y tur nan otro rekisitonan ta na ordo. Pero esakinan ta automobilistanan cu lo kier core riba caminda sin cumpli cu e reglanan. Esey ta castigabel.
Cualkier situacion cu presenta, sea cu e plachi a kibra den un accidente of ta horta, kico cu pasa cu e plachi, yega na Departamento di Impuesto mesora. Mesora tambe, haci un denuncia na polis. E ora bo ta cubri, bo ta duna di conoce kico exactamente por a pasa cu e plachi y bin cu e denuncia di polis na DIMP y nan ta haci e resto. Nan lo percura pa bestel plachinan nobo pa e persona eynan. Pero no bay traha un plachi di bo mes, sin haci nada, pasobra esey ta ilegal.
