Falta aworaki 7 dia prome cu e fecha final di 28 di februari pa e pago riba impuesto di vehiculo di motor. Pa loke ta cumplimento di esaki, vocero di Departamento di Impuesto (DIMP), Meverly Romano, a bisa cu segun ley, e fecha final pa paga por lo menos e prome mita di aña di e belasting aki ta vence dia 31 di januari.
A sosode cu gobierno a dicidi cu ta extende e periodo aki te cu dia 28 di februari y aworaki tin un fecha final, cual ta e fecha aki. Te aworaki tin cu bisa cu di e 88.730 number cu tin registra, tin un cumplimento di 53%.
Un 40% a paga e impuesto di full e aña y 13% a paga e impuesto di mita aña. Esey ta nifica cu tin 53%, un tiki mas cu e mita paga. Pero mirando e periodo cu nos ta aden, cu falta ainda 7 dia di trabao pa por yega e fecha final, tin cu bisa cu esaki ainda ta hopi abao, segun Romano.
Nan sigur ta desea cu e 53% lo ta 80% paga. Pero 53% ta net un tiki mas cu e mita.
Esey ta nifica cu falta hopi ainda. Na e 53% di e numbernan cu tin paga, DIMP kier a gradici nan pa nan cumplimento. E personanan aki a demostra cu nan ta respeta nos leynan, cu nan ta tene cuenta cu nan responsabilidad fiscal. Esey ta algo hopi importante den un mundo di belasting. Pa e resto cu ta falta, cu ta 39.731 plachi di number, no tin ningun pago mes registra riba nan.
Esey ta 45% di e total cu tin registra, di cual e categoria mas grandi di incumplimento ta keda e plachinan di number A cu un total di 34.685, cu no tin ningun pago mes registra. Ni di mita aña, ni di full aña.
Posiblemente e clientenan aki tambe den nan tin un grupo cu no tin añanan anterior paga. Ta p’esey tampoco nan no lo por paga 2019. Pero hecho ta keda si cu e ta un cantidad hopi grandi.
34.685 den plachi di number A so, ta hopi halto, segun Romano. Cu e otro categorianan hunto e ta yega na 39.731.
Despues tin 2% cu no tin pago riba nan, pero esaki ta e personanan cu a entrega nan plachi di number. Posiblemente nan auto no ta den uzo y nan ta entrega nan plachi di number, cu esey ta haci cu nan no tin mester di paga e belasting mesora.
Si wak e cifranan aki y wak cu falta ainda 7 dia pa 28 di februari yega, e ta bisa tambe cu e dianan cu ta sigui lo bay ta sumamente druk. Ta haya si cu un parti ta bay paga via banco, pero si yega na un averahe di e cantidad di dianan cu tin, ta yega na un averahe di 5 mil number cu lo mester ta paga pa dia, si e cumplimento ainda sosode pa dia 28.
E cantidad eynan ta hopi halto. Si 2mil di e personanan ey yega na Camacuri of na cualkier otro oficina di Impuesto, no lo por atende e cantidad ey pa dia. Esey ta bay keda un hecho cu Departamento di Impuesto lo bay ta sumamente druk den e proximo dianan. Loke ta bay sosode ta cu no por bay duna un cantidad hopi grandi di number na e clientenan cu ta acudi.
Pakico
Pasobra mester tene cuenta cu e siguridad tambe. No por yena un sala cu mil pa dos mil persona. Dado momento pa motibonan di siguridad, tin cu para e mashin pa stop di duna number, pa asina por cumpli cu e cantidad di persona.
E salanan di DIMP ta purba di mantene na e entre 250 cu 300 cliente pa dia of den un momento. Si alcansa e cantidad ey den e salanan, e ta bira un situacion caminda cu tin cu cera e mashin di duna number y e personanan, aunke cu kisas nan a yega durante oranan di trabao, toch nan no por haya number. Esey ta algo cu tur biaha ta haya hopi keho riba dje, pasobra a stop di duna number tempran.
Romano ta haci un peticion na comunidad cu mester tene cuenta cu siguridad y siguridad di e personal, pero tambe di e contribuyentenan cu ta acudi.
Mesun cos ta sosode na e MFA nan. Tabata tin un situacion diamars, caminda cu tabata tin e fecha final di BBO, pero tambe hopi cliente cu ta acudi pa paga number di auto. Dado momento ya pa 12’or y mey na un di e MFA nan, mester a stop di duna number pasobra tabata tin 200 persona den sala.
Tin cu tene cuenta cu e siguridad di nan y MFA ta un otro ballgame. DIMP ta huur un espacio cerca nan, pero e edificio no ta di DIMP. Dado momento pa 4’or of 4’or y mey di atardi, nan tin cu cera e edificio. DIMP mester percura pa nan caba di atende tur cliente. Esey ta e motibo tambe pakico na e MFAnan no por keda duna number mesun cos cu ta duna na Camacuri.
Na MFA e dunamento di number ta mas limita cu na Camacuri. Esaki ta algo cu kier a pidi comunidad pa tene cuenta cu e factornan aki, pasobra tur aña ta ripara cu e ta causa hopi critica. Pero tambe ta bon pa bisa esaki pa personanan por tin un idea pakico ta stop di duna number dado momento.
Pagonan
Pa loke ta e pagonan, Camacuri lo ta druk, MFAnan lo ta druk. Keto bay ta keda recomenda pa haci e pago online, via bo banco. E ta facil, e ta sigur. Por haci’e ki ora cu ta. Pero si kier a pidi pa esnan cu ta warda te dia 28 di februari, preferibel haci e pago online parti mainta. Haciendo esaki parti atardi, ta core e riesgo, depende e cutoff time di e banco, cu e pago ta wordo procesa of e ta yega riba e cuenta di DIMP e dia siguiente, esta dia 1.
E ta algo pa tene cuenta cun’e. E momento cu e pago drenta den sistema despues di dia 28 esey ta nifica tambe cu e persona ta bin na remarca pa haya un naheffingsaanslag y logicamente lo haya boet den su aanslag.
Pesey tambe esnan cu ta desea di paga via banco, ta pidi encarecidamente pa haci’e na tempo y preferibel no warda te dia 28, sino mas prome cu esey lo ta mas miho.
Esnan cu ta paga via Aruba Bank y Banco di Caribe, nan pago ta wordo haci e mesun anochi automaticamente den sistema di DIMP. E banconan aki a configura nan sistema automatisa di tal forma cu e ta comunica directamente cu e sistema di DIMP.
E cliente por wak di biaha si a procesa su pago y ki ora e por manda pidi su recibo. Awor aki tambe pa esnan cu ta paga online, e cliente ta manda nan peticion via [email protected] y asina nan ta pidi nan recibo, nan ta manda comprobante di pago y DIMP ta manda e recibo via mail. Esey ta algo cu a anuncia caba algun siman pasa y keto bay e ta na vigor.
