DIMAS ta introduciendo un carnet. Kathy Ruiz-Paskel, directora di e departamento, a splica cu e carnet cu nan a introduci entrante 6 di Maart ultimo, ta un carnet di permiso. Ta un di e productonan cu ta sali for di e sistema nobo cu yama Sirsa. E sistema aki tin mas di un aña cu ta trahando riba dje. Tabata tin un softlaunching di dje na September. Despues di a haci diferente coreccion riba e problemanan di infancia cu tin. Awor aki por ta contento y kier anuncia cu a yega na e siguiente fase, unda cu por lansa e carnet.
Kico e ta encera
Un hende cu haci aplicacion na Dimas, ta haci su cita online, e ta scoge su dia, e ta scoge su ora. E ta bin riba e dia di cita. E ta haci entrega di su peticion y na final di e trayecto ey, lo sali un contesta. Si den caso cu e contesta aki ta uno positivo, e persona lo ricibi for di awo p’adilanti, un carnet unda cu tin tur su datonan di su estadia legal na Aruba. E tin su nomber, su fam, e tin para kico ta e meta di estadia cu e ta na Aruba, cuanto tempo e ta valido. Tambe e tin su potret y tin QR Code. Banda di esaki ta dunando e personanan permiso riba papel, cu tin e condicionnan stipula, pa cual su permiso ta vigente. E persona lo haya tur dos.
Pa loke ta peticionnan despues di Maart, a cambia e proceso y e proceso pa locual cu ta yama prolongacion, esta cu e hendenan no a haci cambio, nan a keda den e mesun posicion, a keda na e mesun dunado di trabao, ta haci’e den un periodo di dos siman, pa asina e cliente tin e contesta den su man. Sea cu ta uno positivo, uno negativo y si en caso cu ta rekeri mas documento, e lo haya sa esaki den dos siman.
E otro ta cu demas peticionnan cu ta cambio y/of prome peticion, tin un backoffice cu lo atende esakinan. Esakinan lo tuma un luna pa atende. Esey ta e cambionan cu a introduci entrante Maart. E carnet aki ta uno cu e cliente por carga hunto cun’e den su cartera y e ora e ta haci hopi mas facil tambe ora cu autoridad puntr’e pa su status legal, cu e por comproba esaki. E QR Code riba dje tin e mesun informacion cu tin riba e carchi, tin tambe den e QR Code. Por scan esaki y haci un comparacion y wak cu esaki ta berdad e persona cu ta bisa cu e ta y cu e tin e estadia legal na Aruba.
Adelanto
Esaki sigur ta un adelanto grandi. Ruiz-Paskel a splica cu a haci cierto cambio di sistema y proceso. Ta trahando cu tempo esaki bira un same day service. Pasobra cu por lo general, un prolongacion ta un formalidad. E hende a cumpli den pasado caba cu e mesun rekisitonan. Ta controla cu tur cos a keda igual y e persona por haya siguientemente un contesta. E parti cu tin ainda ta e reto di September pa awo, ora cu a cuminsa cu e sistema nobo, a encontra cu no por tabata tin output di biaha. Esey a haci cu tabata tin un backlog basta grandi cu ta trahando riba dje for di December caba. Esaki tambe ta finalisando. E clientenan cu tin un peticion na DIMAS y ainda no a haya un contesta, ta sigura nan cu lo traha riba tur. Locual cu kier pidi nan si ta pa subi nan website www.dimasaruba.aw y eyriba tin un checker, ta hinca e number di CRV den dje, y e ora lo sa den ki fase e peticion ta. Si e ta na mita caminda of tin algo cla pa bin busca. Sigui esaki, e ta gratis. Mesun cos cu e servicionan di haci cita online, tur ta gratis. Subi, haci e check, wak con leu e peticion ta y si tin algo cla, pasa na DIMAS, recoge esaki.